Նոր հետազոտության արդյունքում պարզվել է, որ մարդիկ ավելի շատ ստում են տեքստային հաղորդագրություններ գրելիս: Հետազոտողները հանգել են այն եզրակացությանը, որ տեքստային հաղորդագրություններ գրելիս ավելի հեշտ է ստելը և չբացահայտվելը, քան իրական հաղորդակցման ժամանակ։
HealthDay-ը գրում է, որ հետազոտությունն իրականացրել է Դևիդ Յուն, ով պրոֆեսոր է Վիչիտայի պետական համալսարանում: Բրիտանական Կոլումբիայի համալսարանի իր գործընկերների հետ նա անցկացրել է հետազոտություն, որին մասնակցել են 170 ուսանողներ, որոնց ասել են, որ հարկավոր է բաժնետոմսերի կեղծ գործարքներ իրականացնել՝ դեմ առ դեմ մարդու հետ խոսելու, տեսագրության և տեքստային հաղորդագրությունների միջոցով:
Այնուհետև գիտնականներն ուսումնասիրել են, թե ինչ գործարքներ են կնքել ուսանողները և դրա համար հաղորդակցման որ տարբերակն են ընտրել: Պարզվել է, որ ամենաշատ խաբեությունները եղել են տեքստային հաղորդագրությունների միջոցով: Հետազոտողներն ասում են, որ առավել հեշտ է խաբել տեքստային հաղորդագրությունների միջոցով, քանի որ ոչ ոք քեզ չի տեսնում: Գիտնականները կարծում են, որ հետազոտության արդյունքները կարող են օգնել սպառողներին տեղեկացնել, թե ինչպես խուսափել համացանցային կեղծիքներից:
