Գիտնականների միջազգային թիմը հաստատել է, որ հնագույն մարդիկ, որոնք արտագաղթել են Աֆրիկայից, հաստատվել են Արաբական թերակղզու հարավային հատվածում: Հետազոտողների հոդվածը հայտնվել է The American Journal of Human Genetics ամսագրում:
Նոր աշխատանքի շրջանակում հետազոտողները վերլուծել են Արևելյան Աֆրիկայի, Արաբական թեկաղզու և Մերձավոր Արևելքի բնակիչների միտոքոնդրիումային ԴՆԹ-ի 85 նմուշ: Նմուշները պատկանում են հազվագյուտ N1, N2 և X հապլոխմբին, որոնք մոտ են Աֆրիկային ամենաառաջին բնակիչների ԴՆԹ տարբերակին: Վերլուծելով առավել շատ փոփոխվող մասերը` գիտնականները հիմնել են այսպես կոչված միտոքոնդրիումային ԴՆԹ-ի «տոհմածառ»:
Գիտնականները պարզել են, որ ուսումնասիրվող խմբից ամենահինը N1 հապլոխումբն է: Նրա տարիքը կազմում է մոտ 56 հազար տարի: Հաշվի առնելով, որ, գիտնականների կարծիքով, Աֆրիկայից արտագաղթը սկսվել է մոտ 60 հազար տարի առաջ, դա թույլ է տալիս ենթադրելու, որ մարդիկ չեն հասցրել շատ հեռու գնալ: Ամենայն հավանականությամբ, Արաբական թերակղզու հարավային հատվածը մարդկանցով բնակեցված առաջին հենակետն էր:
Հետազոտողների խոսքերով՝ իրենց հետազոտության արդյունքները այս պահին ավելի հավանական են, քան վարկածն այն մասին, որ Աֆրիկայից մարդկանց վերաբնակեցումը տեղի է ունեցել փուլ առ փուլ և Արաբական թերակղզու տարածքով: Այլ վարկածների տվյալներով՝ մարդիկ տեղակայվել են այլ վայրերում կամ շարժվել են միաժամանակ մի քանի ուղղություններով:
