Ռուսական Интерфакс գործակալության փոխանցմամբ՝ Սաուդյան Արաբիայի իշխանություններն Իսպանիային խոստացել են փոխհատուցել նավթի այն դեֆիցտը, որը կառաջանա իրանական նավթի ներկրման վրա ԵՄ-ի կողմից երեկ սահմանված բեռնարգելքից հետո։ Այս մասին Բրյուսելում հայտարարել է Իսպանիայի արտգործնախարար Խոսե Մանուել Գարսիա-Մարգալիոն։
Վերջինս հայտարարել է. «Ես այցելել եմ Սաուդյան Արաբիա։ Դա այն երկիրն է, որը մյուսներից քիչ չէ շահագրգռված, որ Իրանը չշարունակի իր միջուկային ծրագիրը։ Նրանք անձամբ ինձ խոստացել են նույն գնով նավթ վաճառել, ինչ-որ Իրանը»։
Հիշեցնենք, որ ավելի վաղ Իրանը Նավթ արտահանող երկրների կազմակերպությանը (OPEC) կոչ էր արել չավելացնել ԵՄ-ին նավթի մատակարարումները։ Ներկայումս Իրանն իր նավթի նոր գնորդների փնտրտուքի մեջ է։
