«Պոստ Սկրիպտում» մամուլի ակումբի հյուրն էր ՀՅԴ Բյուրոյի Հայ Դատի և քաղաքական հարցերի գրասենյակի պատասխանատու Կիրո Մանոյանը`«Ֆրանսիայի Սենատը քննարկեց Ցեղասպանության ժխտումը քրեականացնող օրինագիծը. որոշումը կայացված է» թեմայի շրջանակներում:
Երեկվա որոշումը քաղաքական մեծ հաջողություն էր, նկատեց նա` հավելելով, որ դա Ֆրանսիայի հաղթանակն էր, Ֆրանսիան տուրք չտվեց Թուրքիայի ճնշումներին:
«Սա համայն հայության հաղթանակն էր, որովհետև Թուրքիայի ջանքերով հարցը Փարիզում վերածվեց հայ-թուրքական մարտի, սա նաև Թուրքիայում ողջամիտ թուրքերի հաղթանակն էր և, իհարկե, թուրքական քաղաքականության պարտությունն էր: Թուրքիան ամեն ինչ արեց, որպեսզի բարձունքից ընկնի, այդ երկիր ԱԳ նախարարը անգամ չգնաց Բրյուսել»,- հայտարարեց դաշնակցական գործիչը:
Կ. Մանոյանի կարծիքով` Ֆրանսիայի նախագահը կստորագրի օրինագիծը. «Սա իսկապես կարևոր հանգրվան է, քանի որ կարող է մեկնարկ դառնալ նաև ԵՄ մյուս երկրների համար»:
Անդրադառնալով այն համոզմունքին, թե Ֆրանսիան նախընտրական շրջանին բնորոշ մի քայլ է անում, Մանոյանը մատնանշեց Սենատում ևս հնչած այդ տեսակետները. «Ամեն ինչ բացատրել նախընտրական գործոնով` ճիշտ չէ, քանի որ շատերը նշում էին, որ ընդունված օրենքը կիսատ է մնացել, դեկլարատիվ բնույթի է և այժմ պետք է ստանա իմպերատիվ բնույթ»:
Թե ինչ ազդեցություն կարող է ունենալ այս օրինագիծը հայ-թուրքական գործընթացի վրա, դաշնակցական գործիչը նկատեց` հայ-թուրքական գործընթաց չկա, որովհետև Թուրքիան իրականում արձանագրություններով շահագրգռված չէ, որպեսզի այլ գործընթաց լինի: Նրանց համար նպաստավոր է այսպիսի իրավիճակը, և առիթ է` այժմ դարձյալ կրկնելու, որ Հայաստանը պետք է հետ վերցնի ստորագրությունը արձանագրություններից:
«Չեմ կարծում, որ երեկվա որոշումը կապված էր արձանագրությունների հետ, սակայն այն, որ Թուրքիան ոչ միայն պատմությունն է ժխտում, այլև իր ստորագրությանը հետամուտ չի լինում, դա անառարկելի է»,- ասաց Մանոյանը:
Ֆրանս-թուրքական հարաբերություններում կլինի սառություն, դիվանագիտական հարաբերությունների նվազում, բայց ոչ տնտեսական ոլորտում, նկատեց Կ. Մանոյանը: