Մեծ Բրիտանիայի դիվանագիտական առաքելությունները կդադարեցնեն շոտլանդական արտահանվող ապրանքների, այդ թվում՝ վիսկիի անվճար գովազդը, եթե Էդինբուրգը անկախանա Լոնդոնից: Ինչպես հաղորդում է բրիտանական The Daily Mail պարբերականը, այս մասին հայտարարել է Մեծ Բրիտանիայի արտգործնախարար Ուիլյամ Հեյգը մասնավոր հանդիպումներից մեկի ժամանակ, որի մանրամասները չեն հրապարակվում:
Այս պահին ամբողջ աշխարհում Մեծ Բրիտանիայի դեսպանատներն ու հյուպատոսությունները զբաղվում են շոտլանդական վիսկիի անվճար գովազդով: Պարբերականը գրում է, որ Շոտլանդիայից թունդ ալկոհոլային խմիչքների արտահանման գումարը կազմում է տարեկան շուրջ 3 մլրդ ֆունտ ստերլինգ (4.6 մլրդ դոլար):
Եթե Էդինբուրգն անկախանա Մեծ Բրիտանիայից, Շոտլանդիան ստիպված կլինըի վճարել գովազդի համար: Ըստ պարբերականի՝ 2011 թ. վիսկիի գովազդին մասնակցել է Մեծ Բրիտանիայի ավելի քան 140 դիվանագիտական առաքելություն:
Շոտլանդիան վիսկիի արտահանությամբ աշխարհում զբաղեցնում է առաջին տեղը՝ մրցակցելով Իռլանդիայի հետ:
Շոտլանդիայի հնարավոր անկախության մասին քննարկումները շարունակվում են արդեն մի քանի տարի: Այս հարցի շուրջ հանրաքվեն տեղի կունենա 2014 թ. աշնանը: ԶԼՄ-ներում լուրեր են տարածվել, որ, անկախ շոտլանդացիների քվեարկությունից, Լոնդոնը հնարավոր է՝ չճանաչի Էդինբուրգի անկախությունը: