RBC-ի հաղորդմամբ, քրեական գործ է հարուցվել ինքնաթիռների հատուկ «Ռուսաստան» ջոկատին կեղծ փաստաթղթերով պահեստամասեր վաճառելու փաստով: Այս ջոկատը տեղափոխում է երկրի բարձրաստիճան ղեկավարներին, այդ թվում նախագահին և վարչապետին:
Ինչպես հաղորդել են Մոսկվայի միջռեգիոնալ տրանսպորտային դատախազությունից, օդանավերի համար առաքված պահեստամասերը կեղծ փաստաթղթեր են ունեցել, ինչպես նաև հայտնաբերվել է, որ այդ պահեստամասերն արդեն առնվազն մեկ անգամ շահագործվել են։ Նշենք, որ այդօրինակ օդանավերի համար ընդհանրապես արգելված է օգտագործված պահեստամասերի շահագործումը:
Սա եզակի դեպք չէ ռուսական ավիացիայի պատմության մեջ: Մի քանի անգամ այսօրինակ գործեր բացվել են, և հայտնի է դարձել, որ օդանավերի վթարի պատճառ են հանդիսացել նախկինում օգտագործված, ապա կեղծ փաստաթղթերով այս կամ այն ավիաընկերությանը վաճառված պահեստամասերը: