Բարձրաստիճան պաշտոնատար անձանց էթիկայի հանձնաժողովի աշխատանքի արդյունավետության երաշխիքը մեկն է՝ օրենքները կյանքի կոչելու կամքի առկայությունը: «Առաջին լրատվական»-ի հետ զրույցում նմա տեսակետ հայտնեց «Բարգավաճ Հայաստան» կուսակցության պատգամավոր Նաիրա Զոհրաբյանը՝ պատասխանելով այն հարցին, թե ի՞նչ երաշխիքներ կան, որ հանձնաժողովի ամրագրած դրույթներն արդյունավետ կգործեն:
«Այս հարցը կարելի է տալ ցանկացած նոր նախաձեռնության դեպքում: Օրինակ՝ ի՞նչ երաշխիք կա, որ առավելագույնս արդյունավետ կգործի մեր կողմից ամեն տարի պարտաճանաչորեն լրամշակվող Ընտրական օրենսգիրքը: Ամեն անգամ թվում է, թե պրոֆեսիոնալ կամ ոչ պրոֆեսիոնալ, նորելուկ կամ ոչ նորելուկ ընտրակեղծարարների համար այդ լրամշակումները սողանքներ չեն թողնում: Եթե չլինի քաղաքական կամք, եթե վերոնշյալ հանձնաժողովի անդամներն օրենքի առջև պատասխանատվություն չզգան, ապա բնականաբար, Էթիկայի հանձնաժողովը կվերածվի շատ կասկածելի մի մարմնի»,- օրինակ բերեց Նաիրա Զոհրաբյանը:
Խորհրդարանականի խոսքով, վերջերս շատ է արծարծվում այն հարցը, որ այդ հանձնաժողովի անդամները պետք է լինեին հանրաճանաչ մարդիկ: «Բայց վերջին շրջանում հանրությանը հայտնի մարդկանց գերակշիռ մասի ընկալումներն այնքան են աղճատվել, և այսպես կոչված՝ էնտուզիազմով հայտնիները մեկ օրում այնքան արագ են վերափոխվում «շաբաշով» աշխատող կլիենտների, որ գուցե լավ է, որ հանրահայտ դեմքեր այդ հանձնաժողովում չկան: Կկարողանա՞ն Էթիկայի հանձնաժողովի անդամները իրենց միակ կարգադրիչը, պատվիրատուն համարել օրենքը՝ կախված է նրանցից»,- ամփոփեց Նաիրա Զոհրաբյանը:
Նշենք, որ օրերս նախագահ Սերժ Սարգսյանի հրամանագրով կազմավորվեց և իր անդրանիկ նիստը գումարեց Բարձրաստիճան պաշտոնատար անձանց էթիկայի հանձնաժողովը: ԱԺ պետաիրավական հանձնաժողովի նախագահ Դավիթ Հարությունյանը, ԲՀԿ-ական և ՕԵԿ-ական պատգամավորներ Վարդան Բոստանջյանի և Հեղինե Բիշարյանի համահեղինակությամբ, հունվարի 10-ին օրենսդրական նախաձեռնության կարգով ներկայացրել է «ԱԺ կանոնակարգ օրենքում» փոփոխություններ և լրացումներ կատարելու մասին նախագիծը: Դրանով, փաստորեն, նմանօրինակ մի հանձնաժողով էլ նախատեսվում է ստեղծել ԱԺ պատգամավորների համար:
Նախագծում հեղինակները մշակել են պատգամավորի վարքագծի կանոններ: Օրենսդիրը պետք է հարգի օրենքը, հանրության բարոյական նորմերը, պահպանի Ազգային ժողովի և նրա հանձնաժողովների նիստերի անցկացման կարգը, ամենուր դրսևորի պատգամավորին վայել վարքագիծ, հարգալից վերաբերմունք ցուցաբերի քաղաքական ընդդիմախոսների նկատմամբ: Այս ամենը չանելու դեպքում հանձնաժողովը նրանց չի կարող ենթարկել պատասխանատվության:
