Ռուսական Regnum լրատվական գործակալության փոխանցմամբ՝ Թուրքիա այցելած Իրանի խորհրդարանի նախագահ Ալի Լարիջանին նախ հանդիպել է Թուրքիայի արտգործնախարար Ահմեդ Դավութօղլուի հետ, որի ժամանակ կողմերը քննարկել են Իրանի միջուկային ծրագրի հարցը, ինչպես նաև սիրիական ու իրաքյան զարգացումները։ Ապա Լարիջանին հանդիպել է իր թուրք գործընկեր Ջեմիլ Չիչեքի հետ։
Հանդիպման ժամանակ Չիչեքը հայտարարել է, որ իրենք ոչ մեկին հնարավորություն չեն ընձեռի խաթարելու երկու երկրների հարաբերությունները. «Մենք եղբայրական երկրներ ենք, մեզ կապում է բազմադարյա բարեկամությունը (որի ընթացքում նրանք միմյանց դեմ մղել են 12 պատերազմ.- 1in.am)։ Ոչ ոքի չի հաջողվի թշնամացնել Թուրքիային ու Իրանին»։ Լարիջանին իր հերթին նկատել է, որ երկու երկրների համագործակցությունը մեծ նշանակություն ունի տարածաշրջանի համար։
Լարիջանին հանդիպել է նաև Թուրքիայի վարչապետ Էրդողանի հետ, որը եղել է դռնփակ և տևել է 2 ժամ։
Հիշեցնենք, որ չնայած վերջին շրջանում ամերիկյան կողմի բազմաթիվ հորդորներին, Թուրքիան հրաժարվում է միանալ Իրանի նկատմամբ սահմանված պատժամիջոցներին:
