Արևմտյան աշխարհն այսօր նշում է Սուրբ Ծնունդը։ Աշխարհի շատ երկրներում ուշ երեկոյան եկեղեցիներում մատուցվելու է Ճրագալույցի պատարագը, հավատացյալները երգելու են Փրկչին փառաբանող գեղեցիկ երգեր։ Վաղը տոնակատարությունները կշարունակվեն, և եկեղեցիներում, քաղաքների, փոքրիկ ավանների ու գյուղերի հրապարակներում, որտեղ տեղադրվելու են Բեթղեհեմի մսուրը պատկերող նկարներ և արձանիկներ, նորից կազմակերպվելու են տոնավաճառներ, երգելու են նվագախմբերը։ Հարազատները և բարեկամները նվերներ են փոխանակում և տոնական սեղանների շուրջ նշում են Փրկչի Սուրբ Ծնունդը։ Դեկտեմբերի 24-ի երեկոյան Գերմանիայում, Ավստրիայում, Շվեյցարիայում Քրիստկինդլը նվեր է բերում այն երեխաներին, ովքեր չարություն չեն արել տարվա ընթացքում։ Անգլերեն նրա անունն է Սանտա Կլաուս, Մեծ Բրիտանիայում, Միացյալ Նահանգներում, Կանադայում, Ավստրալիայում և Նոր Զելանդիայում Սանտան նվերները բերում է դեկտեմբերի 25-ին։ Իսկ, օրինակ, Չեխիայում, Սլովակիայում, Ռումինիայում և Հունգարիայում Քրիստկինդլին, այսինքն` Մանուկ Քրիստոսին անվանում են Յեժիշեկ կամ Միկուլաշ, նա դեկտեմբերի 6-ին է նվերներ բերում երեխաներին։ Իսպանիայում և իսպանախոս այլ երկրներում նվերներ են մատուցում հունվարի 6-ին։ Քրիստոնեության առաջին ժամանակաշրջանում բոլոր եկեղեցիներն են Սուրբ Ծնունդը տոնել հունվարի 5-6-ը։ Հայ Առաքելական եկեղեցին հավատարիմ է մնացել այդ ավանդույթին, մինչդեռ 4-րդ դարում Հռոմը որոշել է Սուրբ Ծնունդը տոնել դեկտեմբերի 24-25-ը։ Պատմաբանները դա բացատրում են Հռոմում այն ժամանակ մեծ տարածում ունեցող և հենց դեկտեմբերի վերջին օրերին նշվող հեթանոսական տոնը` Սատուրնական օրերը արմատախիլ անելու անհրաժեշտությամբ։ Ինչպես և Հայ Առաքելական եկեղեցին` քրիստոնեական արևմտյան եկեղեցիներն էլ Փրկչի Մկրտությունն ու Աստվածահայտնությունը տոնում են հունվարի 6-ին։ Դեկտեմբերի 25-ին Վատիկանում Հռոմի Կաթոլիկ եկեղեցու հովվապետ Բենեդիկտոս 16-րդը հավատացյալներին դիմելու է ուղերձով, որի ընթացքում տասնյակ լեզուներով, այդ թվում` հայերեն, հավատացյալներին շնորհավորելու է Հիսուս Քրիստոսի Սուրբ Ծնունդի առիթով։
