Ողջ աշխարհը պատրաստվում է հունվարի 25-29-ը կայանալիք Դավոսի միջազգային տնտեսական ֆորումին, որը համաշխարհային լուրջ նշանակություն ունի: Այս տարի ամենամյա այդ իրադարձությանն իր մասնակցության մասին արդեն հայտարարել է Ադրբեջանի նախագահ Իլհամ Ալիևը: Ֆորումին ավանդաբար մասնակցում է նաև Վրաստանի նախագահ Միխեիլ Սաակաշվիլին:
«Առաջին լրատվական»-ը փորձեց պարզել՝ ՀՀ նախագահի կամ այլ պաշտոնյայի գլխավորությամբ հայկական պատվիրակություն մասնակցելո՞ւ է արդյոք Դավոսի ֆորումին: Մեր հարցերին՝ ՀՀ նախագահը մասնակցելո՞ւ է արդյոք հունվարի 25-29-ը Դավոսում կայանալիք միջազգային տնտեսական ֆորումին, եթե՝ այո, ապա ի՞նչ է նախատեսվում ֆորումի ժամանակ, պատվիրակության կազմում ովքե՞ր են ընդգրկված, եթե՝ ոչ, ապա ինչո՞ւ ՀՀ-ն չի մասնակցում այդ ֆորումին, ՀՀ նախագահի մամուլի քարտուղար Արմեն Արզումանյանը պատասխանեց. «ՀՀ նախագահի աշխատակազմի հասարակայնության և տեղեկատվության միջոցների հետ կապերի վարչությունը ՀՀ նախագահի հանդիպումների և այցերի մասին տեղեկացնում է պատշաճ կարգով և ժամանակին»:
ՀՀ վարչապետի մամուլի քարտուղար Արամ Անանյանը մեզ պատասխանեց, որ այսօրվա դրությամբ վարչապետի Դավոս այցելության մասին խոսք չկա:
Ըստ ամենայնի՝ այս տարի ևս, ինչպես և անցած տարիներին, հայկական կողմը Դավոսում ներկայացված չի լինի: Վերջին անգամ Սերժ Սարգսյանը Դավոսի ֆորումին մասնակցել է 2009 թվականին՝ հայ-թուրքական երկխոսության «բուռն» շրջանում, որտեղ և հանդիպել էր Թուրքիայի վարչապետ Ռեջեփ Թայիփ Էրդողանի հետ:
Մինչդեռ այդ ներկայացուցչական հավաքին սովորաբար մասնակցում են շուրջ 100 երկրների պատվիրակներ՝ պետությունների նախագահների և կառավարությունների ղեկավարների մակարդակներով:
Ընդ որում, այդ բարձր ամբիոնից և ֆորումի շրջանակներում երկկողմ հանդիպումների ընթացքում Ադրբեջանի նախագահը զերծ չի մնում զանազան հակահայկական հայտարարություններ անելուց, որոնք պարզապես անպատասխան են մնում:
