Իրականում բավական մեծ թիվ են կազմում այն մարդիկ, ովքեր, սեփական սոցիալական ապահովման ցանկությունից դրդված, ցանկություն ունեն բնակություն հաստատել ԼՂՀ ազատագրված տարածքներում: «Առաջին լրատվական»-ի հետ զրույցում այս մասին ասաց «Հայկական ընտրություն» նախաձեռնության անդամ, Քարվաճառի բնակիչ Ալեքսանդր Քանանյանը:
«Սեփական խնդիրների լուծման ճանապարհին շատերը կնախընտրեին բնակվել ազատագրված տարածքներում, փոխանակ մեկնելու արտասահման: Բացի դրանից, նկատվում է ազատագրված տարածքներ տեղափոխվելու հնարավորության մասին մտածող երիտասարդների թվաքանակի աճ: Եթե պետությունը համապատասխան քայլեր ձեռնարկեր, այսինքն՝ սկսեր նորմալ ծավալի բնակֆոնդի շինարարություն, ապա մենք կունենայինք և՛ մարդկանց թվային աճ, և՛ քաղաքացիական հասարակության գիտակից տարրի ձևավորում: Ցավոք սրտի, պետությունն այսօր չի սպասարկում այն ցանկությունն ու հնարավորությունը, որ առկա է ազատագրված տարածքները վերաբնակեցնելու առումով: Միաժամանակ, ամեն ինչ չարժե «գցել» միայն պետության վրա, բայց բնականաբար, պետությունը, որպես հանրային և ազգային կյանքի կազմակերպիչ, ազատագրված տարածքների վերաբնակեցման գործում իր մեծագույն դերը պետք է ունենա, ինչը բնականաբար, չունի»,- ասաց Ալեքսանդր Քանանյանը՝ ավելացնելով, որ հայաստանյան իշխանությունները թե՛ մարդկային, թե՛ մասնագիտական, թե՛ գաղափարական որակներով պետության առջև ծառացած մարտահրավերների լուծման գործին չեն համապատասխանում:
Ամփոփելով՝ նա հույս հայտնեց, որ ամեն ինչից անկախ՝ երիտասարդության մի ստվար զանգված համարձակություն կունենա առավել ակտիվ քննարկելու ԼՂՀ ազատագրված տարածքներում վերաբնակություն հաստատելու հարցը: