Հայ ազգային կոնգրեսի միակ երաշխիքը ընտրություններին ժողովրդի ակտիվ մասնակցությունն է, ՀԱԿ-ն այլ երաշխիքներ չունի: Այսօր կայացած մամուլի ասուլիսի ժամանակ այս մասին ասաց ՍԴՀԿ ատենապետ Լյուդմիլա Սարգսյանը:
«ՀԱԿ-ն ընտրությունների ժամանակ կանգնելու է ժողովրդի կողքին: Մեր կարգախոսը չի փոխվել և չի կարող փոխվել: Մենք համարում ենք, որ մեր երկրում օրինական ընտրված նախագահ չի կառավարում: Հետևաբար մեր ամենակարևոր պահանջներից մեկը լինելու է Սերժ Սարգսյանի հրաժարականի պահանջը: Ժողովուրդը համբերելու տեղ այլևս չունի»,- ասաց նա:
ՀՀԿ-ական պատգամավոր Կարիեն Աճեմյանն իր հերթին նկատեց, որ գարնանը կայանալիք ընտրությունների ժամանակ պետք է աշխատել և ոչ թե սրել իրավիճակը, այլ հակառակը` միասնականություն ցուցաբերել և ապացուցել, որ Հայաստանը կարող է ազատ ու թափանցիկ ընտրություններ անցկացնել:
