Միջազգային փորձագետների, հատկապես` ռուս վերլուծաբանների կողմից շրջանառվող լուրերը, թե Միացյալ Նահանգները վերադառնում է ոսկուն, անհիմն են: Նման կարծիք «Առաջին լրատվական»-ի հետ զրույցում հայտնեց ՀՀ նախկին վարչապետ Հրանտ Բագրատյանը:
«ԱՄՆ-ը ոսկուն չի վերադառնում: Նման բան չկա: Ամբողջ աշխարհը դոլարն է օգտագործում, ինչո՞ւ պետք է ԱՄՆ–ը ոսկուն վերադառնա: ԱՄՆ-ն այսօր ունի արժույթ, որ ամբողջ աշխարհն է ընդունում»,- ընդգծեց նա:
Որոշ երկրներ, այդ թվում՝ Հարավային Կորեան, Ճապոնիան, Չինաստանը, հայտարարում են դոլարից հրաժարվելու մասին: Ճապոնական իենն առանց այդ էլ միջազգային արժույթ է, բայց, Հ. Բագրատյանի խոսքով՝ Չինաստանը չի ուզում դոլարով ակտիվներ կուտակել՝ արդեն ժամանակն է, որ չինական իենը դիրքերն ամրապնդի, նույնը նաև ռուսական ռուբլին: Ըստ նրա՝ այդ երկրները ոչ թե ուզում են հիմնել միջազգային արտարժույթ, այլ ուզում են, որ դոլարի կողքին իրենց արժույթը «պարազիտությամբ» զբաղվի:
Հ.Բագրատյանի գնահատականով՝ Հայաստանի և մյուս փոքր երկրների համար լավ կլիներ, եթե գլոբալ աշխարհը (ԱՀԿ-ին դեռևս չեն անդամակցում միայն 2 երկիր) հիմնի միջազգային արտարժույթ՝ չեզոք, որի տպագրությունը, քանակը և էմիսիան վերահսկեն բոլոր երկրները: «Դա փոքր երկրների երազանքն է: Կան երկրներ, որ աճել են, պայքարում են դոլարի դեմ, բայց իրենց պայքարի նպատակը ոչ թե արդարության հաստատումն է, այլ իրենց ազգային արժույթը խրախուսելը»,- նշեց Հ. Բագրատյանը:
