Թուրքական Radikal թերթի փոխանցմամբ՝ Թուրքիայի վարչապետ Ռեջեփ Էրդողանն անդրադարձել է Ֆրանսիայի Սենատի կողմից հունվարի 23-ին Հայոց ցեղասպանության հերքումը քրեականացնող օրինագծի դիտարկմանը.
«Մենք արդեն իսկ այդ կապակցությամբ հրապարակել ենք Ֆրանսիայի նկատմամբ մեր սահմանած 8 կետանոց պատժամիջոցները։ Մենք կարող ենք շարունակել այդ գործընթացը։ Այդպիսի հարցերը չեն վերաբերում խորհրդարաններին, դա պատմաբանների գործն է։ Այդ ամենն արվում է մայիսին Ֆրանսիայում կայանալիք նախագահական ընտրություններից առաջ։ Թուրքիայում ներդրումներ կատարած ֆրանսիական ընկերությունները խորապես անհանգստացած են»։
Հիշեցնենք, որ նախորդ տարվա դեկտեմբերի 22-ին Ֆրանսիայի Ազգային ժողովն ընդունել էր Հայոց ցեղասպանության հերքումը քրեականացնող օրինագիծը, ինչից անմիջապես հետո Էրդողանը հրապարակել էր Ֆրանսիայի նկատմամբ թուրքական պատժամիջոցները, որոնց բաժանել էր 3 փուլի։ Առաջին փուլին բաժին էր ընկել պատժամիջոցների 8 կետ.
1) Փարիզից Թուրքիայի դեսպանի հետկանչ,
2) Քաղաքական, ռազմական ու տնտեսական ոլորտներում փոխադարձ այցերի, սեմինարների, դասընթացների սառեցում,
3) Զորավարժությունների չեղյալ հայտարարում,
4) Ֆրանսիայի հետ ամեն տիպի քաղաքական խորհրդակցությունների կասեցում,
5) Թուրքիայի տարածքում ֆրանսիական մարտական ինքնաթիռների թռիչքների թույլտվության արգելք,
6) Ֆրանսիայի հետ համատեղ ԵՄ-ի թվինինգ նախագծերին Թուրքիայի մասնակցությունից հրաժարում,
7) Ֆրանսիական ռազմանավերի անցման թույլտվության վերացում,
8) 2012 թվականին կայանալիք տնտեսական նիստին Ֆրանսիայի հետ համատեղ մասնակցելուց հրաժարում։
