ИТАР-ТАСС-ի փոխանցմամբ, իր լատինաամերիկյան շրջագայության շրջանակներում Վենեսուելայում գտնվող Իրանի նախագահ Մահմուդ Ահմադինեժադը Վենեսուելայի նախագահ Ուգո Չավեսի հետ համատեղ մամլո ասուլիսի ժամանակ խիստ քննադատության է ենթարկել ԱՄՆ-ին.
«ԱՄՆ-ը պնդում է, թե մենք (միջուկային) ռումբեր ենք պատրաստում, սակայն բոլորին հայտնի է, որ այդ պնդումներն առաջացնում են ծիծաղ։ Այդ պնդումների տակ քողարկված է իրականությունը, որ ԱՄՆ-ը չի ցանկանում, որ մենք զարգանանք և առաջ գնանք։
ԱՄՆ-ը չի ցանկանում, որ զարգանա մեր տնտեսությունը, վերացվի աղքատությունը, երկիրն ինդուստրացվի։ ԱՄՆ-ը ձգտում է, որ աշխարհի ժողովուրդներն ունենան հազարավոր խնդիրներ, որպեսզի ղեկավարի նրանց և թելադրի իր կամքը։ Սակայն Իրանի ու Վենեսուելայի ժողովուրդների միջև ավելի է խորանալու համագործակցությունը, և մենք կհասնենք մեր նպատակներին»։
Հիշեցնենք, որ Ահմադինեժադի վենեսուելական այցից ժամեր առաջ Ուգո Չավեսը հայտարարել էր, որ ԱՄՆ-ը պետք է զբաղվի իր խնդիրներով՝ ընդգծելով, որ Լատինական Ամերիկայի ժողովուրդներն այլևս երբեք ծնկի չեն գա և չեն ենթարկվի յանկիների կայսրությանը։
