Մշակույթի գործիչների համար առաջիկա խորհրդարանական ընտրություններն ի՞նչ են նշանակում, պատրա՞ստ են արդյոք պատգամավորության թեկնածուներին պարտադրել խոսել Հայաստանում մշակույթի խնդիրների մասին: Դուդուկահար Ջիվան Գասպարյանն առաջիկա ընտրություններին չի պատրաստվում խոսել մշակութային խնդիրներից.«Որտե՞ղ խոսեմ այդ մասին, այդքան ասացինք` մեր CD-ները, մեր ձայնագրությունները գողանում են, ծախում են, անարխիա է, բանի տեղ չանցավ: Գրողների, կոմպոզիտորների միությունները պետք է այդ հարցերով զբաղվեն, անհատը չի կարող միայն այդ հարցով զբաղվել»,-ասաց դուդուկահարը:
Հարցին՝ առաջիկա խորհրդարանական ընտրություններն ի՞նչ են նշանակում Ձեզ համար, ընտրությունների հետ որևէ հույս կապո՞ւմ եք, նա պատասխանեց. «Չգիտեմ՝ ով ինչ է ուզում, չեմ հասկանում ոչ մի բան: Ես ընդհանրապես լավատես եմ, ուզում եմ լավը մտածել: Այդքան ազատություն չպետք է տան, ոնց ուզենան, նկարեն և հեռուստացույցով ցուցադրեն ժողովրդին, մանուկ երեխաները նայում են, մի քիչ զուսպ պետք է լինել: Պետք է գեղխորհուրդ լիներ, անճաշակ կլիպ են նկարում, որ հիմարություն են, ամաչում ես նայել»,-ասաց դուդուկահարը՝ շեշտելով, որ պետք է դրա մասին լուրջ մտածել, քանի որ մանուկներ էլ են դիտում, որը ճաշակ է փչացնում: Նրա խոսքերով՝ամեն մարդ իրավունք չունի երգի, նվագի, պարի:
