ՀՀ պաշտպանության նախարարությունում հունվարի 9-ին տեղի է ունեցել նախարարության կենտրոնական ապարատի խորհրդակցություն:
ՀՀ պաշտպանության նախարարության տեղեկատվության և հասարակայնության հետ կապերի վարչությունից «Առաջին լրատվական»-ին տեղեկացրել են, որ պաշտպանության նախարար Սեյրան Օհանյանը ներկայացրել է ՀՀ Զինված ուժերի 2012թվականի գերակա խնդիրները և հիմնական անելիքները:
Որպես 2012թ. գերակա խնդիրներ` Ս. Օհանյանը առանձնացրել է ռազմակրթության, ռազմական արդյունաբերության և Զինված ուժերում կարգապահության բարձրացման խնդիրները:
Պաշտպանության նախարարը առանձնահատուկ շնորհակալություն է հայտնել պաշտպանության նախարարության և Զինված ուժերի գլխավոր շտաբի ստորաբաժանումների այն աշխատակիցներին, որոնց պատշաճ ծառայության արդյունքում արձանագրվել են Զինված ուժերի 2011թվականի հաջողությունները:
Պաշտպանության նախարարի հրամանով օրինակելի ծառայությամբ աչքի ընկած զինծառայողները և քաղաքացիական ծառայողները արժանացել են ՊՆ գերատեսչական մեդալների ու պատվոգրերի:
Ս. Օհանյանը բարձր է գնահատել նաև ՊՆ մշտական գործող մասնագիտական հանձնաժողովի աշխատանքները և հանձնաժողովի նախագահ, պաշտպանության նախարարի խորհրդական Վահրամ Բարսեղյանին պարգևատրել «Մարշալ Բաղրամյան» մեդալով:
