Իրանի Fars պետական լրատվական գործակալության հաղորդմամբ՝ Իրանը և Ռուսաստանը երկկողմանի առևտրում ամերիկյան դոլարը փոխարինում են իրենց ազգային դրամական միավորներով: Այս մասին հայտարարել է Մոսկվայում Իրանի դեսպան Սեյեդ Ռեզա Սաջադին:
Դեսպանը հայտնել է, որ ռուբլուն և ռիալին անցնելու առաջարկով հանդես է եկել Ռուսաստանի նախագահ Դմիտրի Մեդվեդևը իր գործընկեր Մահմուդ Ահմադինեժադի հետ Ղազախստանի Աստանա քաղաքում հանդիպման ժամանակ:
Fars-ը հաղորդմամբ՝ Իրանը փոխարինել է ամերիկյան դոլարը նաև Հնդկաստանի, Չինաստանի և Ճապոնիայի հետ նավթի առևտրում:
Ինչպես արդեն հաղորդել էինք, Եվրամիությունը, ԱՄՆ-ն և ՄԱԿ-ը պատժամիջոցներ են սահմանել Իրանի դեմ Թեհրանի միջուկային ծրագրի պատճառով: Իրանը բազմիցս է հայտարարել, որ իր միջուկային ծրագիրը քաղաքացիական նպատակ ունի, մինչդեռ ԱՄՆ-ն և նրա մի քանի այլ հզոր դաշնակիցներ կարծում են, որ Իրանը պատրաստվում է օգտագործել ծրագիրը զենք ստանալու նպատակով:
