Ռուսաստանի ԱԳՆ-ն այսօր իր անհանգստությունն է հայտնել կապված այն հանգամանքի հետ, որ Եգիպտոսի դատախազությունը պահանջում է երկրի նախկին նախագահ Հոսնի Մուբարաքին դատապարտել մահապատժի՝ կախաղանի միջոցով: Այս մասին հաղորդում է РИА Новости-ն:
«Դատական գործընթացը Կահիրեում շարունակվում է: Միաժամանակ նման հաղորդագրությունները Մոսկվայում անհանգստությամբ են ընդունվում: Մենք հիմնվում ենք այն փաստի վրա, որ խոսքը մեզ համար եղբայրական Եգիպտոսի ներքին գործերի մասին է: Հույս ունենք, որ վերջնական որոշումները կկայացվեն միջազգային իրավական չափորոշիչների ամենաբարձր մակարդակով»,- ասվում է ՌԴ ԱԳՆ հայտարարության մեջ: – Միաժամանակ հնարավոր ենք համարում միանգամայն մարդկային վերաբերմունք Մուբարաքի դեպքում: Չէ՞ որ խոսքը պատկառելի տարիքի մարդու մասին է, որն արդեն 83 տարեկան է և ըստ տեղեկությունների՝ ծանր հիվանդ: Բացի այդ, որպես քաղաքական գործիչ անցյալ տարվա փետրվարին նա կայացրեց իր հայտնի որոշումը՝ հրաժարվել իշխանությունից, որը, մեծ հաշվով, թույլ տվեց խուսափել անմեղ մարդկանց շրջանում լրացուցիչ զոհերից»:
Հիշեցնենք, որ Հոսնի Մուբարաքը մեղադրվում է անցյալ տարվա սկզբին ժողովրդական ցույցերի ժամանակ ցուցարարների վրա կրակելու հրաման տալու մեջ: Հինգշաբթի օրը Եգիպտոսի գլխավոր դատախազը պահանջեց նրան դատապարտել մահապատժի՝ կախաղանի միջոցով:
