Սմարթֆոն արտադրող՝ աշխարհում խոշորագույն Samsung Electronics ընկերությունը հայտարարել է 2011 թվականի չորրորդ եռամսյակում ունեցած ռեկորդային եկամտի մասին: Երեք ամսվա ընթացքում ընկերությունը աշխատել է 5.2 տրիլիոն վոն (4,5 միլիորդ դոլար):
Ինչպես հայտնում է Reuters գործակալությունը, չորրորդ եռասմայում ունեցած եկամուտը վերլուծաբանների կանխատեսումներից բարձր էր. վերլուծաբանները կանխատեսել էին 4.7 տրիլիոն վոն ցուցանիշ:
Եկամտի առումով ընկերության նախորդ ռեկորդը սահմանվել էր 2010 թվականին, երբ ցուցանիշը կազմել է հինգ տրիլիոն վոն: 2011 թվականի չորրորդ եռամսյակում ընկերությանը հաջողվել է վաճառել մոտ 35 միլիոն սմարթֆոն, իսկ 2010 թվականի նույն ժամանակահատվածում` 95 միլիոն: 2012 թվականին Samsung-ը պլանավորում է վաճառել 170 միլիոն սմարթֆոն:
2011 թվականի երրորդ եռամսյակում Samsung-ը սմարթֆոնների վաճառքի ծավալով զբաղեցրել է երկրորդ տեղը Apple-ից հետո: Գործակալության տեղեկությունների համաձայն՝ ընկերության շահույթը չորրորդ եռամսյակում աճել է նոր ապրանքների հաշվին, որոնք մշակվել և վաճառքի են հանվել 2011 թվականի ընթացքում:
Samsung Electronics ընկերությունը սմարթֆոնների շուկայում հայտնվել է 2010 թվականին: Արդեն երկրորդ եռամսյակում շահույթը կազմել է 22 տոկոս, որը ընկերության պատմության մեջ լավագույն արդյունքներից էր: Այժմ սմարթֆոնների արտադրությունը և վաճառքը Samsung-ի եկամտի գլխավոր աղբյուրներից մեկն է: