Վիրջինիայի Հոլոքոստի թանգարանը կազմակերպում է Հայոց ցեղասպանությանը նվիրված մշտական ցուցադրություն:
Ինչպես հաղորդում է ամերիկյան The Armenian Mirror-Spectator թերթը, դեռ նախորդ տարվա դեկտեմբերին թանգարանում տեղի են ունեցել հատուկ հավաքներ, որոնց նպատակն էր հասարակության ուշադրությունը հրավիրել այստեղ բացվող էքսպոզիցիայի նկատմամբ և քաղաքացիների մոտ ցանկություն արթնացնել հանգանակել համապատասխան ցուցանմուշներ, ինչպես նաև նյութական օգնություն ցուցաբերել: Հավաքը տեղի է ունեցել Վիրջինիա նահանգի Հայկական կրթական կենտրոնի հովանավորության ներքո:
Թանգարանի գրադարանավար Թիմ Հենսլին պարբերականին պատմել է, որ իրենք պատրաստվում են կազմակերպել մշտական էքսպոզիցիա՝ «Ամբողջ աշխարհը չի կարող հաշտվել», որը կներառի 20-րդ և 21-րդ դարերի տարբեր ցեղասպանությունների մասին նյութեր: Սակայն առավել մեծ տեղ կհատկացվի Հայոց ցեղասպանութանն առնչվող նյութերին: Ենթադրվում է, որ դրա նախապատրաստական աշխատանքները կխլեն 2-2.5 տարի: Հենսլին կոչ է արել տեղի հայ համայնքին օգնություն ցուցաբերել՝ այդ ժամանակաշրջանի վերաբերյալ բացառիկ պատմությունների, նամակների և լուսանկարների տեսքով: