Հունաստանի վարչապետ Լուկաս Պապադեմոսը հայտարարել է, որ երկրին դեֆոլտ է սպառնում, որը կարող է տեղի ունենալ արդեն 2012 թ. մարտին:
Ինչպես հաղորդում է BBC-ն, Պապադեմոսի խոսքերով՝ եթե հունական արհմիությունների առաջնորդները համաձայնության չգան աշխատավարձերի հետագա կրճատման հարցի շուրջ, միջազգային վարկատուները կհրաժարվեն երկրին օգնություն հատկացնել:
Իր հերթին, դա կհանգեցնի այն բանին, որ Հունաստանի տնտեսությունը փրկելու ծրագիրը կդադարի աշխատել, և երկիրը չի կարողանա մարել պարտքերը: Սակայն արհմիությունների ներկայացուցիչները հայտարարել են, որ չեն պատրաստվում համաձայնել աշխատավարձերի հետագա կրճատման հետ:
Երկրի ՀՆԱ-ն գերազանցող պարտքի պատճառով Հունաստանը, առավել քան Եվրոպայի մյուս երկրները, հայտնվել է պարտքային ճգնաժամի մեջ: Միայն շնորհիվ 2011 թ. դեկտեմբերին միջազգային վարկատուների տրամադրած հերթական օգնության՝ երկիրը կարողացավ խուսափել տնտեսական փլուզումից: