Սոցիալական ցանցերը վերջին շրջանում սկսել են դառնալ շատերի կյանքի անբաժան մասը: «Առաջին լրատվական»-ը հոգեբան Վլադիմիր Միքայելյանի հետ զրույցում փորձեց հասկանալ` սոցցանցերն ի՞նչ նշանակություն և ազդեցություն կարող են ունենալ մարդու կյանքում, և ինչո՞ւ են դրանք դարձել անչափ տարածված, կարո՞ղ է արդյոք սոցցանցը օգնել մարդուն` չդիմելու ծայրահեղ միջոցների, օրինակ` ինքնասպանության:
Հոգեբանի խոսքով` սոցիալական ցանցը լսարան է, հասարակության հայելին, և երբ մարդն, օրինակ,սոցցանցում տեղադրում է հայտարարություններ իր ինքնասպանության մասին, դա նշանակում է` տվյալ մարդն ուզում է, որ հասարակությունն իրեն ասի` «մի՛ արա այդ բանը», և հենց ինքն էլ կարծես ուզում է խուսափել դրանից:
«Բայց նա չի դիմի ինքնասպանության: Եթե նա ինքնասպանության լուրջ մտադրություն ունենար, սոցցանցում չէր հայտարարի այդ մասին: Պարզապես սոցցանցի միջոցով նա ուզում է լինել ուշադրության կենտրոնում»,- նկատեց հոգեբանը` ընդգծելով, որ սոցցանցն իրականում կատարում է մարդու` ուշադրության կենտրոնում լինելու դերը:
Հոգեբանի համոզմամբ` մարդկանց գրեթե 90 տոկոսի համար սոցցանցը կատարում է ուշադրության կենտրոնում հայտնվելու դեր, բացի այդ` սոցցանցեր` Facebook, Odnoklassniki, շատ են դիմում այն մարդիկ, որոնք անմիջական շփման խնդիր ունեն:
«Այնտեղ շատ ակտիվ են այն մարդիկ, որոնք կյանքում պասիվ են, որոնք կյանքում իրական, անմիջական շփման մեջ ունեն խնդիրներ, ու սոցիալական ցանցերի կարևոր արժեքը հենց այն է, որ մարդիկ կարող են ազատ հաղորդակցվել ու լինել բոլորի ուշադրության կենտրոնում: Քանի դեռ մարդը ցանկանում է գտնվել ուշադրության կենտրոնում, սոցիալական ցանցերը կգործեն հավերժ»,- իր համոզմունքը հայտնեց Վ. Միքայելյանը` ընդգծելով, որ սոցցանցն իրականում ինֆորմացիայի աղբյուր չէ, այլ ուշադրության դաշտում գտնվելու հնարավորություն:
«Ավելին ասեմ, դա մարդու` սիրված լինելու ցանկությունն է , քանի որ ճանաչված լինել նշանակում է սիրված լինել, այսինքն` հայտնվել այնտեղ, որտեղ քեզ վրա ուշադրություն կդարձնեն, ու դու կդառնաս ճանաչված մարդ: Հենց դա է պատճառը, որ բարդույթներ ունեցողների համար սոցիալական ցանցերն անփոխարինելի հնարավորություն են: Դրա համար է երիտասարդությունը օրուգիշեր նստած ինտերնետի վրա, որովհետև իրական կյանքում նրանք այդ ուշադրությանը չեն արժանանում»,- հավելեց վերջինս:
Ըստ հոգեբանի` սոցիալական ցանցերն ունեն մեկ այլ առավելություն ևս, այն է` շփում առանց պատասխանատվության: Մարդն իրական կյանքում շփման մեջ կրում է պատասխանատվություն, իսկ վիրտուալ կյանքում դիմացինի նկատմամբ դա չկա:
«Հենց դրա համար սոցցանցերը միշտ կլինեն ու կավելանան»,- ամփոփեց հոգեբանը: