Որպես Մեքսիկայի մեծագույն գուշակ հայտնի մարդը հերքել է լուրերը, թե 2012 թ. գալու է աշխարհի վերջը: Այդ մասին հայտնում է Associated Press գործակալությունը:
Ինչպես պատմել է Անտոնիո Վասկես Ալբան ամենամյա մամլո ասուլիսի ժամանակ, մայաները երբեք չեն կանխագուշակել աշխարհի վերջը: 2012 թ. աշխարհի վերջի թեորիան նա անվանել է «մեծագույն սուտ»:
Հիշեցնենք, որ 2012 թ. աշխարհի վերջի մասին ենթադրությունները հիմնավորվում են նրանով, որ մայաների օրացույցը վերջանում է հենց 2012-ին:
Վասկեսը կարծիք է հայտնել, որ հարավամերիկյան առաջնորդները վերջին շրջանում քաղցկեղով հիվանդանում են կախարդության պատճառով: Ինչպես հիշեցնում է գործակալությունը, մի քանի օր առաջ Վենեսուելայի նախագահ Ուգո Չավեսը հարց էր բարձրացրել` արդյո՞ք ԱՄՆ-ը քաղցկեղի հիվանդությունը չի ուղարկել իր և Բրազիլիայի, Արգենտինայի ու Պարագվայի իր գործընկերների վրա:
Գուշակի անձնական կայքում տեղակայված են նրա բոլոր գուշակությունները: Մասնավորապես, նա գուշակել էր 3 խոշոր ավիավթարներ՝ մեծաքանակ զոհերով, Իտալիայում երկրաշարժ, Էկվադորի հրաբխի ժայթքում ու Խաղաղ օվկիանոսում ցունամի:
Վասկես Ալբան ամենամյա գուշակություններ է կատարում 1980-ից ի վեր, սակայն, ինչպես նկատում է գործակալությունը, դրանք այնքան էլ իդեալական չեն: Այսպես՝ 2008 թ. նա գուշակել էր փոփ երգչուհի Բրիթնի Սփիրսի մահը:
