Թուրքական Hürriyet թերթի ինտերնետային կայքում տեղադրվել է Իրանի կողմից Հորմուզի նեղուցում իրանական հրթիռների փորձարկման մասին պատմող տեսանյութ, որը, ի դեպ, վերնագրված է հետևյալ կերպ. «Իրանի մահացու հրթիռները»։ Նախորդ տարվա դեկտեմբերի 24-ից մինչև այս տարվա հունվարի 2-ը Իրանը տվյալ ռազմավարական շրջանում անցկացրել է «Վելայաթ 90» խորագրով ռազմածովային զորավարժությունները։
Զորավարժությունների վերջին փուլում Իրանը փորձարկել էր «երկիր-ծով» տիպի Qader և «երկիր-երկիր» տիպի Nour հրթիռները։ Դրանց փորձարկումները հաջող են անցել։
Հիշեցնենք, որ օրեր առաջ Թուրքիայի վարչապետ Էրդողանը համապատասխան մարմիններին հրամայել էր զարկ տալ թուրքական հրթիռաշինությանը՝ ընդգծելով, որ այդ պլանում Թուրքիան բավական հետ է Իրանից, քանի որ վերջինիս հրթիռների հեռահարությունը կազմում է 2000-2500 կիլոմետր, իսկ թուրքական հրթիռներինը՝ ընդամենը 150 կիլոմետր։