Հռոմի պապ Բենեդիկտոս 16-րդը գարնանը դեպի Լատինական Ամերիկա կատարելիք շրջագայության ժամանակ Մեխիկո չի այցելի: Նշենք, որ շրջագայության ընթացքում Բենեդիկտոս 16-րդը պատրաստվում է այցելել Կուբա և Մեքսիկա: Եկեղեցական պաշտոնյաններն ասում են, որ պատճառը անվտանգության հարցը չէ, այլ 84-ամյա պապի առողջությունը: Մայրաքաղաքը գտնվում է 7000 ոտնաչափ բարձրության վրա, ինչը կարող է լրջորեն ազդել պապի առողջության վրա:
Մեքսիկայում և Կուբայում հռոմեական կաթոլիկ եկեղեցու պաշտոնյաները արդեն մանրամասներ են հայտնել Հռոմի պապի ուղևորության վերաբերյալ: Բենեդիկտոս 16-րդը պատրաստվում է մարտի 23-26-ը լինել Մեքսիկայի Գուանաջուատո նահանգում, որտեղ նրան կընդունի նախագահ Ֆելիպե Կալդերոնեն:
Los Angeles Times-ը հաղորդում է, որ Գուանաջուատո նահանգը ամենապահպանողական կաթոլիկ նահանգն է, մինչդեռ Մեխիկոն Մեքսիկայի միակ շրջանն է, որտեղ օրինականացվել է միասեռականների ամուսնությունը:
Մեքսիկայից հետո պապը երկու օր կանցկացնի Կուբայում, որտեղ կհանդիպի նախագահ Ռաուլ Կաստրոյի հետ:
