Ամանորյա տոներից հետո շատերիս մոտ է ցանկություն առաջանում մի քանի օրում կուտակված ավելորդ կիլոգրամից ազատվել: Ի՞նչ անել դրանից խուսափելու համար: «Առաջին լրատվական»-ի հետ զրույցում հարցի շուրջ պարզաբանումներ տվեց Առողջապահության նախարարության կուրորտաբանության և ֆիզիկական բժշկության գիտահետազոտական ինստիտուտի բժիշկ-դիետոլոգ Վարդանուշ Պետրոսյանը:
Ըստ նրա`ամենակարևորը տոնական օրերին և նախատոնական օրերին սննդամթերքի պիտանելիության ժամկետներին հետևելն է: Նա առաջին հերթին խորհուրդ է տալիս ճիշտ պահպանված սնունդ գնել, որպեսզի թունավորումներ չառաջանան: Սա է ամենակարևորը:
«Տոնական օրերի 10, 12 օրում քաշի մեծ ավելացում չի կարող լինել, որ առողջությանը վտանգ լինի կամ առողջապահական խնդիր առաջանա: Խնդիրներ առաջանում են ոչ թե նրանից, որ մարդիկ խառնում են սննդամթերքները, այլ նրանից, որ ուտում են ոչ առողջ, հին սնունդ և թունավորումներ են առաջանում հին ուտելիք օգտագործելիս, թե չէ 10 օր է ընդամենը»,- ամփոփեց բժիշկ-դիետոլոգը:
Անդրադառնալով բարձր և ցածր կալորիականությամբ սննդամթերքներին` նա ասաց, որ շատ գիրացնող ուտելիք չկա, այլ կա շատ ուտել, ուտելիքը չարաշահել: Վ. Պետրոսյանը նշեց, որ մեծ քանակով ցածր կալորիականությամբ ուտելիքը նույնն է, ինչ փոքր քանակությամբ բարձր կալորիականությամբ ուտելիքը: «Կարելի է ուտել և ուտել ամեն ինչ, սակայն պետք է այդ ուտելիքից ստացած կալորիաները ծախսել ֆիզիկական ծանրաբեռնվածության միջոցով:
Մեկ շաբաթ այդպես սնվելը մեծ փոփոխությունների չի բերի, ուրիշ բան, եթե ալկոհոլ են շատ օգտագործում, դա է ավելի վնասակար»,- ամփոփեց Վ. Պետրոսյանը:
Մեր այն դիտարկմանը, թե տոնական օրերից հետո շատերը նախընտրում են բեռնաթափման օրեր անցկացնել, ասաց, որ դրանք վնասակար չեն: «Կարելի է նաև բեռնաթափման օրեր անցկացնել: Կարծում եմ՝ մի քանի օր բեռնաթափում անցկացնելը առողջությանը չի վնասում»,- նշեց բժիշկ-դիետոլոգը:
