Տարին «Հրապարակ» օրաթերթի համար բավական բարդ էր դատական հայցերի առումով: «Առաջին լրատվական»-ի հետ զրույցում հայտնեց «Հրապարակ» օրաթերթի գլխավոր խմբագիր Արմինե Օհանյանը` ամփոփելով տարին: Ըստ նրա` տարին բարդ էր, որովհետև օրաթերթի դեմ կային դատական հայցեր:
«Գալիք տարի մեզ հետ ենք տեղափոխում երկու դատական գործընթաց: Մնացած առումներով թերթի համար բավական լավ տարի էր, մենք ոչ մի օր չենք դադարել տպագրվել, փորձել ենք հավատարիմ մնալ մեր ընթերցողին և նրա պահանջներն ենք բավարարել»,- նշեց Ա. Օհանյանը` հավելելով, որ ինչ-որ տեղ հաջողել են, և դա ընթերցողը գնահատել է:
Նա նաև ասաց, որ անձնակազմը կայունացել է և թրծվել, նորմալ ստեղծագործական տարի էր: Անդրադառնալով գալիք տարվան`հույս հայտնեց, որ
2012-ը նույնպես կլինի այդպիսին:
«Մենք ստեղծագործական խնդիրներ չունենք, սակայն ընտրական տարի է, և մեզ ավելի ծանր աշխատանք է սպասվում, քան նախորդ տարի: Սպասելիքները կապվում են քաղաքական ոլորտի հետ, քանի որ առջևում ընտրություններ են: Ես հույս ունեմ, որ անփորձանք կանցնենք տարվա ընտրական թոհուբոհի միջով»,- ասաց «Հրապարակ» օրաթերթի գլխավոր խմբագիրը` հույս հայտնելով, որ երկիրը նույնպես անկորուստ դուրս կգա այս տարվա միջով:
Գալիք տարվա ընթացքում նա կարևորեց ԶԼՄ-ների անաչառ, օբյեկտիվ աշխատանքը: Ըստ նրա` պարտքը հասարակության առջև պետք է ճիշտ կատարել, որպեսզի ընթերցողը կարողանա ճիշտ կողմնորոշվել, թե ում օգտին քվեարկի գալիք ընտրություններին:
