2011թ. Հայաստանի երիտասարդական հիմնադրամն իրականացրել է շուրջ 130 ծրագիր` ի տարբերություն նախորդ տարվա, երբ կյանքի է կոչվել ընդամենը 30 ծրագիր: Սա նշանակում է, որ երիտասարդները մեզ ավելի շատ են սկսել վստահել: Այս մասին լրագրողների հետ հանդիպմանը տեղեկացրեց Հայաստանի երիտասարդական հիմնադրամի հոգաբարձուների խորհրդի համակարգող, ԱԺ պատգամավոր Կարեն Ավագյանը:
Թվարկելով հիմնադրամի իրականացրած ծրագրերը` նա առանձնացրեց կրթական, առողջապահական ծրագրերը: Կրթական ծրագրերի համար ՀՀ ԿԳ նախարարության հետ համատեղ իրականացվել է 600 պետական բուհերի ուսանողի ուսման վարձի վճարում:
«Հիմնադրամը նրանց ընտրելիս առաջնորդվել է երկու հիմնական սկզբունքով` սոցիալապես անապահով լինելն ու գերազանց առաջադիմությունը»,- նշեց նա` հայտնելով, որ ծրագիրը լինելու է շարունակական, ու 2012թ. դարձյալ նույնքան գումար է փոխանցվելու անապահով ուսանողների վարձը վճարելու համար:
ՀՀ կառավարության աջակցությամբ հիմնադրամն այս տարի 50 միլիոն դրամ է հատկացրել «Քվանտ» վարժարանին, ինչի միջոցով վարժարանը կարողացել է ավարտել հետազոտական կենտրոնի հիմնանորոգման աշխատանքները:
Կենտրոնը համալրվել է ֆիզիկայի, քիմիայի, կենսաբանության ժամանակակից լաբորատորիաներով: «Այն հանրապետության միակ դպրոցն է, որ ունի միջազգային սերտիֆիկատ»,- նշեց նա:
Իր խոսքոմ նա նշեց, որ երիտասարդ գիտնականների «Պահանջում ենք գիտության ֆինանսավորում» խմբին, ինչպես խոստացել էր ՀՀ նախագահը, կտրամադրվի 100 մլն դրամ: «Երիտասարդ գիտնականները իրենք կտնօրինեն այդ գումարը»,- տեղեկացրեց նա:
Հայաստանի երիտասարդական հիմնադրամը կրթության ու գիտության նախարարության հետ համատեղ իրականացրել է նաև դրամաշնորհային ծրագիր` 5 մլն դրամ է տրվել մարզային 10 ՀԿ-ների` մարզերում իրականացնելու կրթական ծրագրեր:Կ. Ավագյանի խոսքով` հիմնադրամն անցնող տարում դեղերի շուկայում իրականացրել է մոնիթորինգ:
«Երիտասարդությունն ամբողջությամբ վստահում է մեզ` չի եղել ոչ մի կազմակերպություն կամ անհատ, որ իր ծրագրերով դիմի մեզ, և նրանց առաջարկությունները հաշվի չառնվեն: Թե՛ դիմադիր, թե՛ ընդդիմադիր երիտասարդները դիմել են մեզ, և մենք ընդառաջել ենք»,- ընդգծեց վերջինս:
