Վայոց ձորում 40 ՓՀԷԿ-երի կառուցման թույլտվություն է տրված, որից 14-ն արդեն կառուցվել է, իսկ մնացածն ընթացքում է: Այս մասին այսօր լրագրողների հետ հանդիպման ժամանակ հայտնեց Վայոց ձորի մարզպետ Սերգեյ Բագրատյանը` կարևորելով ներդրողին չխանգարելու քաղաքականության մշակումը և աշխատատեղերի ստեղծումը:
Ըստ մարզպետի` իրանական կողմի առաջարկով ուսումնասիրվում է Եղեգնաձորի պահածոների գործարանը վերագործարկելու հարցը. ներդրումները կկազմեն 250 հազար դոլար` հավելած ՀՀ կառավարության համաֆինանսավորումը: Նույն գործարանը վերագործարկելու մասին առաջարկ կա նաև Իտալիայից:
Մարզպետը հայտարարեց, թե ֆինանսների նախարարությունը ոչ մի խախտում չի հայտնաբերել` բացառությամբ դպրոցաշինության ոլորտի, որտեղ 3 մլն դրամի կարգի խախտումը պայմանավորված է եղել այն բանով, որ երկրաբանական հետախուզական աշխատանքները ճիշտ չէին կատարվել, հատակը խոնավ էր, և փայտյա մանրահատակը փոխարինվել է սալիկներով:
Պայմանավորվածություն կա Իրանի Խոյ նահանգի հետ. հաջորդ տարվա գարնանից իրանցիները պատրաստվում են ոչխարների առաջին 100 գլխաքանակը ներկրել Ավստրիայից Հայաստան` պայմանով, որ տեղական տեսակների հետ խաչասերում չլինի, և ոչխարի միսն ու բուրդը ամբողջությամբ իրացվելու են այդ նահանգում: Ըստ Բագրատյանի` անցնող տարում անասնապահության ոլորտում աճը կազմել է 22%:
