Ադրբեջանական APA լրատվական գործակալության փոխանցմամբ՝ Ադրբեջանի բնապահպանության և բնական պաշարների նախարարության ներկայացուցիչ Մութալիմ Աբդուլհասանովը մեկնաբանել է մամուլում հայտնված այն տեղեկատվությունը, թե Թուրքիան մտադիր է Կուր գետի վերին հոսանքում հէկեր կառուցել, ինչի համար պետք է փոփոխության ենթարկվի Կուր գետի հունը, և այն Կասպիցի փոխարեն կթափվի Սև ծով.
«Այդ տեղեկատվությունը չի համապատասխանում իրականությանը։ Ճիշտ է՝ Թուրքիան ցանկանում է հէկեր կառուցել, սակայն խոսքը չի գնում գետի հունի փոփոխության մասին։ Թուրքիան մտադիր է էներգետիկ նպատակներով ծախսել միայն 285 միլիոն խորանարդ մետր ջուր՝ 1 միլիարդ խորանարդ մետրից։
Թուրքիայի այդ քայլը ոչ մի կերպ չի անդրադառնա Մինգեչաուրի հէկի գործունեության վրա։ Համապատասխան երկարաժամկետ հիդրոլոգիական պայմանագրով՝ Ադրբեջան հասնող ջրի ծավալը կազմում է 2.17 միլիարդ խորանարդ մետր, սակայն թուրք-վրացական սահմանին այդ ցուցանիշը կազմում է 1 միլիարդ խորանարդ մետր։
Եթե Կուր գետի ջրի ծավալը նվազի 285 միլիոն խորանարդ մետրով, ապա դա ոչ մի կերպ չի անդրադառնա մեր ջրային պաշարների և էկոհամակարգի վրա։ Ամեն դեպքում, դա Թուրքիայի ինքնիշխան իրավունքն է։ Պետությունն իրավասու է օգտագործել իր տարածքում սկզբնավորվող ջրային պաշարների 50 տոկոսը։ Դա հաստատված է նաև միջազգային կոնվենցիաներով»։
