Իրանական Fars News լրատվական գործակալության փոխանցմամբ՝ Իրանի հոգևոր առաջնորդ այաթոլլա Սեյեդ Ալի Խամենեին երկրի արտգործնախարարության ղեկավարության, իրանցի դեսպանների ու պատգամավորների մասնակցությամբ տեղի ունեցած նիստի ժամանակ հայտարարել է, որ սխալ է այն կարծիքը, թե ԱՄՆ-ն է հանդիսանում մերձավորարևելյան զարգացումների նախաձեռնողը.
«Մերձավորարևելյան տարածաշրջանում զարգացումները ծնունդ առան տեղի ժողովուրդների իսլամական զարթոնքի պատճառով։ Այդ զարգացումները վկայում են տվյալ երկրների հասարակությունում իսլամական կրոնական արժեքների դերի մեծացման մասին։
Տարածաշրջանում տեղի ունեցած վերջին իրադարձությունների ժամանակ տեղի ժողովուրդները հանդես են գալիս ազատություն և անկախություն ձեռք բերելու օգտին։ Սակայն իսլամական աշխարհի զարթոնքը չի նշանակում, թե այդ բոլոր երկրները վերածվելու են կրոնապետության՝ այդ պլանում որպես մոդել ընտրելով Իրանը»։
