«Առաջին լրատվական»-ի հարցերին պատասխանում է ԱԺ ՀՅԴ խմբակցության ղեկավար Վահան Հովհաննիսյանը։
– Պարոն Հովհաննիսյան, ինչպե՞ս կմեկնաբանեք ՀՀԿ 20-ամյակի հանդիսավոր նիստում Սերժ Սարգսյանի ելույթը:
– Եթե այդ ելույթում հնչած պահանջները սեփական կուսակցության նկատմամբ ռեալ կյանքի վերածվեն, ապա հրաշալի կլինի: Պարզապես դեպքեր եղել են` հրաշալի ելույթներ ենք լսել, ինչպես օրինակ` ընտրվելուց հետո Սերժ Սարգսյանի ուղերձը, մի շարք այլ ելույթներ, այնտեղ շատ խիստ ու արդար պահանջներ են դրվել պետական համակարգի, իր իսկ իշխող կուսակցության, դաշնակիցների նկատմամբ: Սակայն խնդիրն այն է, թե որքանով են դրանք կյանքի կոչվում, ռեալ կյանքում դրսևորվում: Մենք սրան ենք սպասում, և եթե իսկապես կյանքի կոչվեն այդ պահանջները, դառնան իրողություն, ապա շատ լավ կլինի: Օրինակ` ուրախ եմ, որ նախագահը, թեկուզ տարիներ անց, ընդունում է, որ ամենամեծ վտանգը կոռուպցիան է: 1999-2000-ականներից սկսած, երբ լինելով ԱԺ պաշտպանության, ներքին գործերի և անվտանգության հարցերով հանձնաժողովի նախագահ, առաջ էի քաշել «Կոռուպցիայի կանխարգելման մասին» օրենքի նախագիծը, իշխանություններն ասում էին, թե մեր երկրում կոռուպցիա չկա: Այսինքն` պրոգրեսն ակնհայտ է. հիմա ասում են` ոչ միայն կոռուպցիա կա, այլև` ազգային անվտանգության ամենամեծ սպառնալիքն է կոռուպցիան: Շատ լավ է, և հուսով ենք` այդ սպառնալիքի դեմ պայքար կծավալվի: Երկրորդ` քանի տարի առաջ մենք սկսեցինք «Թիկնազորային ծառայության» օրենքի քննարկումը, առաջարկեցինք պրոյեկտ, բազմիցս այն քննարկվեց ու բարեփոխումների ենթարկվեց: Հիմա նախագահական ապարատն էլ է դա քննարկել, ու նախագահն էլ համարում է, որ թիկնապահների հարցը պետք է լուծվի: Շատ լավ է, շատ ողջունելի է: Ես ուղղակի ուզում եմ, որ կառավարությունը, ստորին օղակները, կուսակցությունը լսեն նախագահին և կիրառեն այն, ինչ ինքը պահանջում է:
– Ձեր կարծիքով, որքանո՞վ կկիրառեն այդ պահանջները:
– Չգիտեմ: Դա արդեն իրենց հարցրեք:
– Իսկ Ձեր կարծիքով, ինչո՞ւ է այսօր նոր խոսվում այդ մասին:
– Դա էլ չգիտեմ: Դա էլ իրենց հարցրեք:
– Հավատո՞ւմ եք, որ Սերժ Սարգսյանն անկեղծ էր այդ ելույթում, թե՞ ընտրությունների նախաշեմին փորձում է մաքրել իր շրջապատը:
– Ինչ դրդապատճառով էլ մաքրվի նախագահի շրջապատը, այնուամենայնիվ, ողջունելի կլինի: Դրդապատճառները դնելով մի կողմ` մաքրման պրոցեսն ինքնին լավ բան է:
– Ու հավատո՞ւմ եք, որ մաքրվում է շրջապատը, թե՞ այդ ամենն ընդամենը հերթական հերթապահ խոսքեր են:
– Չեմ կարող ասել: Դրա համար էլ սկզբում ասացի, որ մեզ համար կարևորը ելույթում հնչածն իրականացնելն է:
– Ժամանակին ՀՅԴ-ն նախաձեռնեց «Թիկնազորային ծառայության մասին» օրենքի նախագիծը, և այն ժամանակ ՀՀԿ-ն կարծես թե դեմ էր դրան, իսկ հիմա Սերժ Սարգսյանը խոսում է այդ մասին, և տպավորություն է ստեղծվում, որ ուզում են ամեն ինչ իրենց ձեռքով անել:
– Դե, դա միշտ է նկատելի: Ամենալավ օրենքը կարող ես բերել, սկզբում իրենք դեմ կարտահայտվեն, կառավարության բացասական եզրակացությունը կբերեն, իսկ ահա որոշ ժամանակ հետո այդ նույնը, եթե ժողովրդի մեջ կարող է դիվիդենտներ բերել, կվերցնեն և կփորձեն անել սեփական ձեռքերով: Այդ ամենը մենք շատ հաճախ ենք նկատել: Ուղղակի տվյալ դեպքում հասարակության մեջ այնքան հաճախ է մեր կողմից հնչեցվել «Թիկնազորային ծառայության մասին» օրենքի անհրաժեշտությունը, այնքան շատ են մեր կողմից քննարկումներ նախաձեռնվել, որ հեղինակությունը բոլորին հայտնի է: Ուղղակի խնդիրն այն է, որ այդ երևույթի վտանգավորությունը հիմա է տեղ հասնում: Պարզ է դառնում, որ այդ թիկնապահները ձևավորվում են որպես օլիգարխիկ խմբերի բանակներ, և հայտնի է, որ երևանյան բոլոր աղմուկ հանած կռիվների` Տեցի կռուգների մեջ թիկնապահներն են մասնակցում: Հավանաբար այս վտանգի գիտակցումը տեղ է հասնում:
– Սերժ Սարգսյանն իր ելույթում խոսեց նաև ընդդիմության մասին և նրանց բաժանեց երեք խմբի: ՀՅԴ-ն իրեն ո՞ր խմբում է տեսնում:
– Նախագահին պետք է հարցնեք` որ ընդդիմությանը որտեղ է տեսնում: Իսկ մենք ունենք մեր սեփական տեղը և միշտ այդ մասին ասել ենք: Մենք երբեք երկիրը ցնցումների տանելու գնով ներքաղաքական պայքարը չենք տարել, չենք տանում և չենք տանի: Բայց դա բացարձակապես չի ազդում մեր վճռականության վրա և չի թուլացնում վճռականությունը: Երբ մենք խոսում ենք իշխանափոխության մասին, նկատի ունենք համակարգային փոփոխությունը: Եվ չենք սահմանափակվում նախագահի պերսոնայով: Բնականաբար, այստեղից կարելի է եզրակացություններ անել: