Թուրքական Ihlas լրատվական գործակալության փոխանցմամբ՝ Ստամբուլի 14-րդ ծանր հանցագործությունների դատարանում շարունակվում է Ստամբուլի հայկական «Ակօս» թերթի նախկին խմբագրապետ Հրանտ Դինքի սպանության դատավարությունը։
Այս տարվա վերջին (23-րդ) նիստի ժամանակ կասկածյալ Էրհան Թունջելը հանդես է եկել սկանդալային հայտարարությամբ՝ ընդգծելով, որ Հրանտ Դինքի սպանության բացահայտման դեպքում կբացահայտվի նաև 1980 թվականի ռազմական հեղաշրջումը.
«Դինքին սպանել են Թուրքիայում հերթական ռազմական հեղաշրջումը հեշտացնելու համար։ Տրապիզոնի ոստիկանության նախկին պետ Ռամազան Աքյուրեքին, Ստամբուլի նախկին նահանգապետ Մուամեր Գյուլերին ու Անկարայի հետախուզության վարչության նախկին պետ Ալի Ֆուաթ Յըլմազերին մեղադրեցին պարտականությունների թերացման մեջ և տեղափոխեցին այլ պաշտոնների, որպեսզի նրանց տեղը նոր մարդկանց բերելով՝ հեշտացնեն հեղաշրջումը»։
Հաջորդ դատալսումը տեղի է ունենալու 2012 թվականի հունվարի 10-ին։
Հիշեցնենք, որ 1980 թվականի սեպտեմբերի 12-ին Թուրքիայի զինված ուժերի գլխավոր շտաբի պետ, բանակի գեներալ Քենան Էվրենի իրականացրած ռազմական հեղաշրջման արդյունքում արձակվեց երկրի խորհրդարանը, տապալվեց Սուլեյման Դեմիրելի գլխավորած կառավարությունը։ Դեմիրելը, ինչպես նաև ընդդիմության առաջնորդներ Բյուլենթ Էջևիթն ու Ալփասլան Թյուրքեշը ձերբակալվեցին։ Երկրում փակվեցին բոլոր քաղաքական կուսակցությունները, և մտցվեց ռազմական դրություն։
Հեղաշրջման նախապատրաստման համապատասխան հիմքի ստեղծման համար ձախ և աջ արմատականների միջև մինչև հեղաշրջման առավոտ հրահրված բախումներում զոհվեց 2000 մարդ, հեղաշրջման արդյունքում բանտարկվեց 650,000 մարդ, ոստիկանությունում հարուցվեց 1,683,000 գործ, քաղաքական պատճառներով հարուցված 210,000 գործի շրջանակներում դատարանում հայտնվեց 230,000 մարդ, 517 մարդ ստացավ առավելագույն պատժաչափ, միևնույն ժամանակ այդպիսի պատժաչափ էր սպառնում 7000 հոգու, 388,000 մարդ զրկվեց անձնագրից, աշխատավայրից վտարվեց մոտ 30,000 մարդ (նրանց ասացին, որ իրենք վտանգավոր են), որոնցից 20,000-ը ներկայացնում էին կրթական համակարգը, 14,000 մարդ զրկվեց քաղաքացիությունից, մոտ 30,000 մարդ փախավ երկրից, գրաքննության նկատառումներից ելնելով` արգելվեց 937 ֆիլմ, 400 լրագրողների համար առաջարկվեց 4000 տարվա բանտարկության մեղադրանք, 300 օրվա ընթացքում թերթերը չհրապարակեցին հետաքննության մասին նյութեր, ոչնչացվեց 37,000 տոննա թերթ ու հանդես:
1982 թվականի նոյեմբերի 7-ին Քենան Էվրենը 7-ամյա ժամկետով նշանակվեց Թուրքիայի 7-րդ նախագահ:
