Չեմ բացառում, որ հեղափոխությունը առանց ցնցումների Հայաստանում կարող է ստանալ միս ու արյուն: Այսօր լրագրողների հետ հանդիպման ժամանակ նման տեսակետ հայտնեց «Սարդարապատ» նախաձեռնության անդամ Ժիրայր Սեֆիլյանը` խոսելով իշխանափոխության և իրենց` այլընտրանքային իշխանություն ստեղծելու ծրագրի մասին: Նա նշեց, որ «Սարդարապատ» շարժումը խոստանում է ժողովրդին այս վիճակից հանել:
«Առաջիկա օրերին գործնական քայլերի հստակեցման իմաստով ես բոլորի անունից խոստանում եմ` դուք ականատեսը կլինեք այդ քայլերի: Մենք մինչև մեր ազատագրման գործընթացը սկսելը պետք է պատրաստվենք, քանի որ գիտենք` մեր երկիրը պատրաստ չէ երկար ցնցումների: Եթե մենք լծվենք մեր ունեցած ծրագրին, չեմ բացառում, որ առանց ցնցումների հեղափոխությունը ստանա միս ու արյուն: Մենք գերին չենք դառնալու անցնցում իշխանափոխության»,- նշեց Ժ. Սեֆիլյանը`հավելելով, որ գերնպատակը պետություն ստեղծելն է, որն իշխանափոխությամբ պետք է լինի:
Ամփոփելով տարին` համատեղ ասուլիսի ընթացքում Տիգրան Խզմալյանն ասաց, որ տարին լի էր պատմական իրադարձություններով և կորցրած հնարավորություններով, որը հավասարազոր է նահանջի: Ըստ նրա` կարելի է երկար խոսել անկման մասին: «Մի կողմից` բնակչության աղքատությունը, իսկ ամենաթանկ վարունգի պայմաններում զարգացումներից կարող են խոսել հոգեկան հիվանդները»:
Նա կարևորեց երիտասարդական քաղաքացիական նախաձեռնությունների առկայությունը: «Ամենակարևորն, ըստ մեզ, երիտասարդների և Սփյուռքի վերելքն էր: Կարելի է նշել ռեժիմի դրսի տերերի աջակցության թուլացումը ևս»,- ամփոփեց Տ. Խզմալյանը: