Թուրքական Dünya Bülteni կայքի փոխանցմամբ՝ Թուրքիան հերթական անգամ սպառնացել է 2012 թվականի հուլիսից կես տարով ԵՄ-ի նախագահությունը Կիպրոսի կողմից ստանձնելու կապակցությամբ։
Թուրքական լրատվամիջոցը նշում է, որ երբ Կիպրոսը ստանձնի ԵՄ-ի նախագահությունը, դա կնշանակի, որ նա նույն ժամկետով ստանձնում է նաև «Եվրոպական բանակ»-ի (ԵՄ-ի խաղաղապահ և ոստիկանական ուժ) հրամանատարությունը։
Այդ բանակը ներգրավված է ԵՄ-ի ու ՆԱՏՕ-ի տարբեր նախաձեռնություններում (օրինակ՝ Կոսովոյում ու Բոսնիայում), որոնց մասնակցում են նաև թուրք զինծառայողներն ու ոստիկանները։ Այժմ Թուրքիան սպառնում է Կիպրոսի կողմից ԵՄ-ի նախագահությունը ստանձնելու դեպքում իր զինծառայողներին ու ոստիկաններին հետ կանչել «Եվրոպական բանակ»-ից, քանի որ չի ցանկանում, որ նրանք գտնվեն Կիպրոսի հրամանատարության ներքո։
Հիշեցնենք, որ ավելի վաղ Թուրքիան քանիցս սպառնացել էր մինչև Կիպրոսի կողմից ԵՄ-ի նախագահության ստանձնումը «Կիպրական հարց»-ի չկարգավորման դեպքում սառեցնել ԵՄ-ի հետ հարաբերությունները։
