«Առաջին լրատվական»-ի հետ զրույցում քաղտեխնոլոգ Արմեն Բադալյանն անդրադառնալով մեր հարցին, թե ովքեր են լինելու 2012թ. գլխավոր խաղացողները` կուսակցություններ, քաղաքական ուժեր, նշեց. «Խորհրդարանական ընտրություններին մնացել է չորս ամիս, և դժվար է ասել, որ ինչ-որ մի նոր ուժ կգա և կկարողանա մեծ ընտրազանգված գրավել, դա տեսականորեն հնարավոր է, բայց գործնականում հնարավոր չէ:
Քաղաքական դաշտի ազդեցիկ երեք ուժերն են` Հայ ազգային կոնգրեսը, Հանրապետականը, «Բարգավաճ Հայաստան» կուսակցությունը, իսկ ոչ ազդեցիկները` Դաշնակցությունն ու «Ժառանգությունը»: Հիմնական խաղացողները լինելու են առաջին երեք ազդեցիկ ուժերը, որոնք ձգտելու են պառլամենտում մեծ տեղեր գրավել, իսկ վերջին երկուսը` ձգտելու են ամեն գնով գոնե հինգ տոկոսը հաղթահարելով մտնել պառլամենտ և խմբակցություն ունենալ: Քաղաքական դաշտում այլևս ոչ մի ուժ գոյություն չունի` լինի դա ՕԵԿ, ԱԺՄ, ԱԺԴ, «Նոր ժամանակներ», Ազատ դեմոկրատներ և այլն: Սրանք վիրտուալ կուսակցություններ են, դրանք ազդեցություն չունեն: Եթե մասնակցեն ընտրություններին` 0.01 տոկոսի համար են պայքարելու»:
«Առաջին լրատվական»-ի հարցին` ի՞նչ հնարավոր տրանսֆորմացիաներ ու դաշինքներ կարող են ձևավորվել գալիք տարում` Արմեն Բադալյանը նշեց. «Իմ նշած ազեցիկ և ոչ ազդեցիկ երեք ուժերը առանց որևէ դաշինքների մասնակցելու են ընտրապայքարի: Այսօրվա դրությամբ որևէ դաշինքի ձևավորման մասին խոսք չկա և ամենայն հավանականությամբ չի լինելու: Այսինքն` այդ ուժերը առանձին գնալու են ԱԺ ընտրությունների, երեք ազդեցիկ ուժերը փորձելու են հնարավորին չափ տեղեր վերցնել խորհրդարանում, իսկ մյուսը ոչ ազդեցիկները փորձելու են մտնել ԱԺ: Խոսքը, սակայն, գոյություն չունեցող կուսակցությունների մասին չէ, այսինքն` կարող է ԱԺՄ-ն, ԱԺԴ-ն միանան, բայց դա ընդհանրապես հարց չի լուծում»: