Դեկտեմբերի 27-ին ՀՀ Ազգային ժողովի նախագահ Սամվել Նիկոյանն ընդունել է Հայաստանում ԵՄ պատվիրակության նորանշանակ ղեկավար, դեսպան Տրայան Հրիստեային:
ԱԺ նախագահը շնորհավորել է նրան նշանակման կապակցությամբ և կարևորել ԵՄ գրասենյակի հետ ստեղծված համագործակցությունն ավելի ակտիվ դարձնելը: Նա նշել է, որ շարունակելով ստեղծված ավանդույթները` համագործակցությունը պետք է լինի արդյունավետ ու գործնական` այդ գործընթացում ակնկալելով նաև Տրայան Հրիստեայի ջանքերը:
Հայաստանում ԵՄ պատվիրակության ղեկավարը բարձր է գնահատել Ազգային ժողովի հետ համագործակցությունը և ԱԺ նախագահ Սամվել Նիկոյանի պատրաստակամությունը` հնարավորինս արդյունավետ համատեղ աշխատանք իրականացնել: Նա ողջունել է խորհրդարանն ու մամուլի հետ աշխատանքն ավելի թափանցիկ դարձնելու` ԱԺ նախագահի հայտարարություններն ու գործողությունները:
Ազգային ժողովի նախագահ Սամվել Նիկոյանը նշել է, որ խորհրդարանը ժողովրդի ընտրած մարմինն է, չպետք է կտրված լինի նրանից և նրա համար պետք է լինի թափանցիկ: Տեղեկացնելով, որ ԱԺ նախագահ ընտրվելուց հետո իր առաջին կարգադրություններից մեկը եղել է լրագրողների մուտքը Ազգային ժողով ավելի ազատ դարձնելը, Սամվել Նիկոյանը պատրաստակամություն է հայտնել նաև ավելի սերտ աշխատել հասարակական կազմակերպությունների հետ:
Զրուցակիցները կարևորել են ազատ ու թափանցիկ ընտրությունների անցկացումը և դրանք որպես այդպիսին ընդունելը հասարակության ու միջազգային հանրության կողմից:
ԵՄ ներկայացուցիչը գոհունակություն է հայտնել ազատ, արդար ու թափանցիկ ընտրություններ անցկացնելու` իշխանությունների պատրաստակամության առթիվ և հույս հայտնել, որ ընտրությունների արդյունքները կընդունվեն բոլոր այն կուսակցությունների կողմից, որոնք կարևոր դեր ունեն քաղաքական կյանքում:
Զրուցակիցներն անդրադարձել են նաև ԵՄ հետ իրականացվող ծրագրերին, մասնավորապես Արևելյան գործընկերությանն ու համագործակցությանը «Եվրանեսթ» ԽՎ շրջանակներում:Այս մասին «Առաջին լրատվական»-ին տեղեկացնում են ՀՀ ԱԺ հասարակայնության և տեղեկատվության միջոցների հետ կապերի վարչությունից:
