Սևանա լճի հիմնահարցերի հանձնաժողովի նախագահ Վլադիմիր Մովսիսյանը այսօր լրագրողների հետ հանդիպման ժամանակ ներկայացրեց Սևանա լճի հիմնախնդիրները և ներկայացրեց 2011 թվականին իրականացրած աշխատանքները:
Մովսիսյանը նշեց, որ այս տարվա ընթացքում Սևանա լճի մակարդակը բարձրացել է 24 սմ-ով` հավելելով, որ վերջին 10 տարիների ընթացքում ջրի մակարդակը անընդհատ բարձրանում է: Նա համոզմունք հայտնեց, որ կառավարության որոշումը, համաձայն որի` 2002-ից 2030 թվականների ընթացքում Սևանա լճի մակարդակը 6 մետրով պետք է բարձրացնել, իրատեսական է. մինչև նշված թվականը ջրի մակարդակը այդքան կբարձրանա:
Մովսիսյանը տեղեկացրեց, որ ոռոգման նպատակով օգտագործվող ջրի ծավալները ևս պակասել են. վերջին երեք տարիներին ոռոգման համար օգտագործվել է 150 միլիոն խմ ջուր, մինչդեռ նախորդ տարիներին 203 միլիոն խմ էր օգտագործվում:
Մովսիսյանը վստահեցրեց` ջրածածկ ճանապարհների առումով այսօր այլևս խնդիրներ չկան, և մաքրման աշխատանքները գրեթե ամբողջությամբ կատարվել են: Նրա խոսքերով` Սևանի ափին կա 4717 շենք-շինություն, որի 82 տոկոսը շարժական է, և միայն 18 տոկոսն է քարաշեն և ունի պետական գրանցում: Մնացած 82 տոկոսը, ըստ Մովսիսյանի, պետք է ապամոնտաժվի, և դրանց ծախսերը պետք է կատարի սեփականատերը: Պետական գրանցում ունեցող շինությունների ապամոնտաժման ծախսերը և համապատասխան փոխհատուցումը պետք է իրականացնի պետությունը:
Մովսիսյանը տեղեկացրեց, որ առաջընթաց կա նաև ջրի լուսաթափանցելիության հարցում. եթե մինչև 2008-ը այն 4-5 մետր էր, այս տարվա տվյալներով` 8-11 մետր:
Անդրադառնալով լճի կենսաբազմազանությանը` Մովսիսյանը նշեց, որ հենց այստեղ են կուտակված ամենաշատ թերությունները, և դրանց մեծ մասը չի լուծվել: Նա նշեց, որ թեև ձկների արհեստական վերարտադրության հարցում որոշակի տեղաշարժ կա, և այս տարվա ընթացքում 367 հազար մանրաձուկ է լցվել Սևանա լիճը` ավելացնելով լճում առկա ձկնատեսակլի քանակը, սակայն դա ուրախալի հանգամանք դժվար է համարել, քանզի բնական վերարտադրության առումով որևէ դրական տեղաշարժ չկա:
