News Georgia-ի փոխանցմամբ, Վրաստանի խորհրդարանը երեկ հաստատել է ազգային անվտանգության նոր հայեցակարգը: Դրա օգտին քվեարկել է 111 պատգամավոր, իսկ դեմ՝ 3։ Փաստաթուղթը բաղկացած է 5 գլխից ու 42 էջից և փոխարինելու է 2005 թվականի հուլիսին ընդունված նախորդ հայեցակարգին։
Նոր հայեցակարգում Ադրբեջանն անվանված է որպես Վրաստանի «ռազմավարական գործընկեր», իսկ Թուրքիան՝ Վրաստանի «առաջատար տարածաշրջանային գործընկեր»։ ՆԱՏՕ-ի անդամ Թուրքիան որակված է նաև որպես «նշանակալից ռազմական գործընկեր»։
Փաստաթղթում նշված է, որ Վրաստանը ձգտում է ընդլայնել Հայաստանի ու Ադրբեջանի հետ սերտ գործընկերային և առևտրային հարաբերությունները, և որ տարածաշրջանի երկրները պետք է ձևավորեն միացյալ մոտեցում՝ տարածաշրջանի զարգացման նկատմամբ։ Հայաստանի հետ հարաբերությունները որակված են որպես «սերտ գործընկերություն»։
Ղարաբաղյան հակամարտության հետ կապված՝ փաստաթղթում նշված է, որ այն սպառնում է տարածաշրջանի երկրների կայունությանը, և որ Վրաստանը ողջունում է միջազգային իրավունքի սկզբունքների հիման վրա այդ հակամարտության խաղաղ կարգավորումը։
