«2012 թվականի Հայաստանի գործունեության կարևորագույն ոլորտներից են պաշտպանությունը և զինված ուժերը, այսինքն` տարածաշրջանում պետք է լինել ամենաուժեղ ռազմական ուժը` հիմնված պաշտպանական ուժի վրա»,- այսօր լրագրողների հետ հանդիպման ժամանակ կարծիք հայտնեց Տարածաշրջանային հետազոտությունների հայկական կենտրոնի ղեկավար Ռիչարդ Կիրակոսյանը:
Նա շեշտեց, որ ի տարբերություն Ադրբեջանի` Հայաստանն աջակցում է տարածաշրջանային անվտանգությանը, Հայաստանի կողմից պատերազմի վտանգ չկա, և դա ճանաչվում է նաև միջազգային հանրության կողմից: Բայց այս ամենով հանդերձ` Կիրակոսյանը չափազանց կարևոր մարտահրավեր է համարում Հայաստանի զինված ուժերում բարեփոխումներ կատարելը, քանզի բանակում կարգապահությունը բարձր մակարդակի վրա չէ, գրանցվում են անընդունելի մահեր. «Յուրաքանչյուր հայ զինվորի սպանությունը մեկ այլ հայ զինվորի ձեռքով անընդունելի է: Շատ լուրջ քայլեր պետք է ձեռնարկվեն ներքին կարգապահությունն իրականացնելու համար»:
Ռիչարդ Կիրակոսյանը նշեց, որ պաշտպանության նախարար Սեյրան Օհանյանին պետք է աջակցել, որպեսզի նա կարողանա մաքրել ՊՆ-ն, պատժել և հեռացնել այն սպաներին, որոնք չեն վաստակել համազգեստ կրելու իրավունքը. «Պետք է մարտահրավեր նետել Խաչատուրովին, Միքայել Հարությունյանին, մարտահրավեր նետել բոլոր այն սպաներին, ովքեր իրենց պաշտոնները ձեռք են բերել և պահում են միայն Ղարաբաղում կատարած գործունեության շնորհիվ: Այսօր Հայաստանի սպաները պետք է սպա լինեն նրա համար, ինչ արել են այսօր, այլ ոչ թե նրա համար, ինչ արել են երեկ»:
