Հայաստանում հանքարդյունաբերության նպատակով, ընդհանուր առմամբ, օգտագործվում է 8.55 հազ. հա տարածք: Ինչպես այսօր տարեվերջյան ասուլիսի ժամանակ ներկայացրեց ՀՀ էներգետիկայի և բնական պաշարների նախարար Արմեն Մովսիսյանը, եթե դա փորձենք համադրել երկրի ընդհանուր տարածքի հետ, ապա հանքարդյունաբերության համար օգտագործվում է ՀՀ-ի շուրջ 0.15%-ը՝ մետաղական և 0.14%-ը՝ ոչ մետաղական հանքերի համար:
Ա. Մովսիսյանի խոսքով՝ հանքարդյունաբերության ոլորտում արդյունահանված հանքաքարի ծավալը կազմել է 20.2 մլն տոննա (նախորդ տարվա համեմատ աճը՝ 10%):
Այս տարի արտադրվել է 7.4 մլրդ կՎտժ էլեկտրաէներգիա, որը 933 մլն կՎտԺ-ով կամ 14.5%-ով գերազանցում է նախորդ տարվա ցուցանիշը: Ընթացիկ տարում արտահանվել է 1.36 մլրդ կՎտժ էլեկտրաէներգիա, որը 295 մլն-ով կամ 28%-ով ավելի է նախորդ տարվա նույն ժամանակահատվածի համեմատ:
2011 թ. ՀՀ-ում սպառվել է 5.8 մլրդ կՎտժ էլեկտրաէներգիա, ինչը 504 մլն կՎտժ-ով կամ 10%-ով ավելի է 2010 թ. համեմատ, այդ թվում արդյունաբերության մասով աճը 4% է, իսկ ոռոգման և խմելու ջրի համակարգերի մասով պակաս է ծախսվել ավելի քան 20%-ով:
Այս պահի դրությամբ՝ ՀՀ է ներկրվել 2,077 մլն խմ գազ, նախորդ տարվա 1,765 մլն խմ-ի դիմաց, աճը` 17.7%: Ներկրված գազից 600 մլն խմ-ն իրանական է: «Մեր էներգետիկ համակարգը բավական անկախ է և էներգակիրների ներկրման առումով, եթե ֆորս մաժորային իրավիճակ ստեղծվի Իրանի հետ կապված՝ մենք կարող ենք ապահովել մեր համակարգի անկախությունը»,- ասաց նախարարը:
Անդրադառնալով իրանական կողմի հետ նախանշված մյուս ծրագրերին՝ նավթատար խողովակաշարի կառուցում, Մեղրիի ՀԷԿ և այլն, Ա. Մովսիսյանը նշեց, որ դրանց ուշացումը զուտ տեխնիկական բնույթ ունի և կապված է իրանական կողմի հետ: Մասնավորապես՝ վաղը՝ դեկտեմբերի 23-ին, Իրանի նախագահ Մահմուդ Ահմադինեժադի ՀՀ կատարելիք այցի շրջանակներում նախատեսվում է ստորագրել Մեղրի ՀԷԿ-ի մասով կոնկրետ ժամկետների ծրագիրը, նաև կքննարկվի մյուս ծրագերի խնդիրը, թե որը երբ պետք է սկսվի:
