Բիլ Մյուրեյին չի բավարարել «Ուրվականների որսորդները-3» ( Ghostbusters) ֆիլմի սցենարը:
Ինչպես հայտնում է Digital Spy-ը, սցենարը գրվել է Դեն Էյքրոյդի և Հարոլդ Ռեմիսի մասնակցությամբ: Այս դերասանները Մյուրեյի հետ նկարահանվել են «Ուրվականների որսորդների» նախորդ երկու ֆիլմերում: Հաղորդվում է, որ Բիլին այնքան դուր չի եկել տեքստը, որ նույնիսկ պատռել է թղթերը՝ նախքան այն հեղինակներին վերադարձնելը: Ավելին, նա նույնիսկ սցենարին ավելացրել է հետևյալ մեկնաբանությունը` «Ոչ ոք չի ցանկանա գումար վճարել ուրվականների հետևից վազող գեր ծերուկներին դիտելու համար»:
Ավելի վաղ Մյուրեյը հասկացրել էր, որ այնքան էլ հետաքրքված չէ նոր ֆիլմով: Դեն Էյքրոյդը հայտարարել է, որ ցանկանում է ֆիլմի նկարահանումներին մասնակցել 2012 թվականի գարնանը, նույնիսկ եթե Բիլը չմասնակցի նախագծին: Իսկ Սիգուրնի Ուիվերը, ով նույնպես խաղացել է նախորդ ֆիլմերում, մտադիր չէ մասնակցել երրորդ ֆիլմի նկարահանումներին, եթե այնտեղ չլինի Մյուրեյի կերպարը:
«Ուրվականների որսորդները» էկրան է բարձրացել 1984 թվականին: Նրա բյուջեն կազմում էր 32 միլիոն դոլար, սակայն վարձույթից ստացվել էր ավելի քան 280 միլիոն դոլար: Երկրորդ ֆիլմը էկրան է բարձրացել 1989 թվականին և նույնպես մեծ հաջողությունների է հասել:
