«Գնագոյացման խնդիրները մեր դաշտում գտնվում են այնքանով, որքանով գտնվում են բարձր կենտրոնացվածություն ունեցող շուկաների դաշտում»,- այսօր լրագրողների հետ հանդիպմանը հայտարարեց Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը` պատասխանելով հարցին` ինչ է արվում անցյալ տարվա նման ամանորյա թանկացումներ թույլ չտալու համար:
Նա նշեց, որ ամենօրյա մոնիտորինգ է իրականացվում, որպեսզի գնային չարաշահումներ չլինեն:
Ա. Շաբոյանի խոսքով` առավել շատ գնային չարաշահումներ նկատվում են խոշոր տնտեսվարողների մոտ, որոնք հրավիրվել են Հանձնաժողով և զգուշացվել, որ զերծ մնան խախտումներից:
«Իհարկե, կան շուկաներ, որ վերահսկողությունից դուրս են: Այն, ինչը գտնվում է մեր դաշտում, մենք խստորեն վերահսկելու ենք»,- ասաց Ա. Շաբոյանը` հայտնելով, որ մոնիտորինգ է իրականացվում որոշակի սոցիալական նշանակության ապրանքային շուկաներում, որոշ գերիշխող տնտեսվարողների մոտ ու սուպերմարկետներում (Ալեքս Գրիգ, SAS, Սթար, Ֆրեշ). «Էական գնային փոփոխություններ չկան այն ապրանքների մասով, որոնք գտնվում են մեր տեսադաշտում»: