Կոտայքի մարզպետ Կովալենկո Շահգալդյանը ցնդաբանություն է որակում «Ժողովուրդ» թերթի այն հրապարակումը, համաձայն որի ինքը 2008 թվականին 150.000 ԱՄՆ դոլար գումար է վերցրել Հրազդանի նախկին ոստիկանապետ Ավետիք Աբրահամյանից` նրան Կոտայքի մարզային ոստիկանապետ նշանակել տալու համար: Այս մասին մարզպետն ասաց «Առաջին լրատվական»-ի հետ զրույցում:
Շահգալդյանի խոսքով, առնվազն ցնդաբանությունների ոլորտից են լուրերը, թե ինքը Ավետիք Աբրահամյանից կաշառք է վերցրել և որ այդ առնչությամբ ՀՔԾ-ում շուտով պատրաստվում են հարցաքննել իրեն: «Այս ամենը հիվանդ մարդու երևակայության արդյունք է: Ամեն մի ցնդաբանությունը հո հետևանքեր չի՞ ունենում»,- նկատեց նա:
Հարցին՝ պատրաստվո՞ւմ է արդյոք իր խոսքով՝ «ցնդաբանության» համար դատի տալ թերթին, Կոտայքի մարզպետն ասաց. «Ես զառանցանքներին չեմ արձագանքում»:
Նշենք, որ դեռևս նոյեմբերի 30-ին «Ժողովուրդ» թերթը հիշեցրել էր, որ 2008-ին Կոտայքի մարզպետ Կովալենկո Շահգալդյանը` Կովալը, 150.000 ԱՄՆ դոլոր գումար էր վերցրել Հրազդանի նախկին ոստիկանապետ Ավետիք Աբրահամյանից` նրան Կոտայքի մարզային ոստիկանապետ նշանակել տալու համար: Օրերս պարզվել է, որ այս հրապարակման հիման վրա ՀՀ հատուկ քննչական ծառայությունը քննություն է սկսել: Ավելին, ՀՔԾ-ն «զրուցելու» էր հրավիրել մեր լրագրողներից Սոնա Գրիգորյանին` նրանից պարզելու, թե որտեղից է դա իրեն հայտնի: Թերթը տեղեկացել է նաև, որ փաստերի հավաքագրումից հետո կհարցաքննեն նաև մարզպետ Կովալենկո Շահգալդյանին և Ավետիք Աբրահամյանին, որն այժմ Մաշտոցի ոստիկանապետն է: