Ասել, որ Հայաստանը պետք է միակողմանի՝ արևմտամետ կամ ռուսամետ դիրքորոշում ցուցաբերի՝ սխալ կլինի. մենք պետք է ցույց տանք, որ որպես անկախ երկիր՝ կարող ենք ինքնուրույն ու բազմաբևեռ քաղաքականություն վարել: «Առաջին լրատվական»-ի հետ զրույցում այս մասին ասաց սոցիոլոգ Ահարոն Ադիբեկյանը:
«Մենք պետք է կողմնորոշվենք այն ուղղություններով, որտեղ ունենք մեծ համայնքներ՝ նրանց իրավունքները պաշտպանելու և կարողություններն օգտագործելու համար: Դրա համար էլ մենք և՛ ռուսամետ ենք, և՛ ամերիկամետ ենք, և՛ լիբանանամետ ենք, և՛ իրանամետ ենք, և՛ ճապոնամետ, և՛ չինամետ: Պետք է հասկանանք, որ միակողմանի դիրքորոշումը միշտ շատ վատ բաների է բերում: Հայաստանի համագործակցությունն ու կողմնորոշումը պետք է լինեն ինչպես դեպի Արևմուտք, այնպես էլ դեպի Ռուսաստան: Այդ գործընթացներում ենք սովորում, փորձ ենք փոխանակում և այլն, այնպես որ՝ դա շատ նորմալ է:
Մենք, օրինակ, կարող ենք մտնել ԵՄ՝ միանգամից դառնալով եվրոպական ընտանիքի անդամ, և կարող ենք մտնել Ռուսաստան, Ռուսաստանն էլ մտնի ԵՄ, այսինքն՝ հարցը ճանապարհների տարբերության մասին է: Պարզապես խնդիրն այն է, որ եթե ամբողջությամբ ինտեգրվենք եվրասիական նոր ստեղծվող միությանը, Եվրոպան երևի երբեք էլ չտեսնենք: Դրա համար մեր քաղաքականությունը բավականին զգուշավոր է:
Մենք, հնարավոր է, քաղաքական առումով ներգրավվենք եվրասիական միավորման մեջ, բայց տնտեսական առումով լինենք անկախ: Գոնե ունենք տնտեսական լուրջ հակափաստարկներ, որ այդ միության մեջ մտնելու դեպքում շատ բան կորցնում ենք, ոչ թե գտնում»,- նկատեց սոցիոլոգը:
Անդրադառնալով ընդդիմադիր դաշտում ընդգծված արևմտամետ և ռուսամետ կուսակցություններ ունենալ-չունենալու հարցին՝ Ահարոն Ադիբեկյանը նկատեց, որ նման հստակ կողմնորոշում ունեցող հայաստանյան քաղաքական ուժեր դրանց թվում չկան: