«Ընդդեմ կանանց նկատմամբ բռնության կոալիցիան» «Առաջին լրատվական»-ին տեղեկացնում է, որ այսօր` ժամը 12:00-ին, Վերաքննիչ քրեական դատարանում տեղի է ունեցել դատական նիստը` Յանիս Սարկիսովի բողոքի քննությունը:
Նիստը նախագահում էր դատավոր Սևակ Համբարձումյանը, ներկա էին դատավոր Արմեն Դանիելյանը և Մանուշակ Պետրոսյանը:
Յանիսի պաշտպանը հանդես է եկել իր բողոքով, իր պատասխանով հանդես է եկել նաև մեղադրող կողմը և իրավահաջորդը: Ըստ Յանիսի պաշտպանի` Յանիս Սարկիսովը պետք է արդարացվի կամ գործը նորից պետք է ուղղարկվի առաջին ատյանի դատարան, որտեղ կսկսվի վերքննությունը:
Դատավոր Մանուշակ Պետրոսյանը նշել է, որ Յանիսն իր կնոջ` Զ. Պետրոսյանի մահվան հետ կապված երեք պատաճառներ է նշում, ըստ իր ցուցմունքների, որ Զարուհին մահացել է աստիճաներից վայր ընկնելու հետևանքով, իրենց մեջ փոքր վիճաբանություն է եղել, և վերջինը մահացել է թույնի պատճառով:
Դատավորը հարցն ուղղել է ամբաստանյալին` Յանիս Սարկիսովին, թե, ի վերջո, ըստ Յանիսի, ինչի՞ց է մահացել իր կինը: Երկար մտածելուց հետո Յանիսը պատասխանել է` թույնից, իսկ ի՞նչ թույնից և որտեղի՞ց է ձեռք բերել Զարուհին այդ թույնը, այդպես էլ մնաց անհայտ:
Հաջորդ դատական նիստը տեղի կունենա 2011թ. դեկտեմբերի 27-ին` ժամը 14:00-ին, որի ժամանակ կողմերին հնարավորություն կտրվի հանդես գալ կարճ ռեպլիկով և իրենց միջնորդությամբ:
