Պետականություն ունեցող երկրում հայրենակցական միությունների գոյությունը պետության թուլացման բացահայտ արդյունք է, բացարձակ թուլացման նշան: «Առաջին լրատվական»-ի հետ զրույցում նման տեսակետ հայտնեց մշակութաբան Դավիթ Ջալոյանը:
«Եթե պետությունը չի աշխատում, մարդիկ փորձում են միմյանց հետ ուրիշ տեսակի կապեր հաստատել: Իսկ որ պետությունը թուլանում է, դա արդեն քաղաքականություն է: Հայաստանը մեծ թվով մարդիկ են լքում, և հայրենակցական միություններն իրար հետ կապ հաստատելու լավ, սակայն նեղանձնական միջոց են, ասենք՝ ապարանցին ապարանցու կամ ջավախահայը ձավախահայի հետ և այլն: Արտագաղթից հետո մարդկանց միջև բնականոն կապերը խախտվեցին: Հասարակության ինտեգրման առումով մեծ խնդիր գոյություն ունի: Միաժամանակ, նման ընկերակցությունների գոյությունը կլանայնության առկայության ախտանիշ է: Իմ կարծիքով, ասենք՝ Մոսկվայի հայերը պետք է միավորվեն ըստ բնակության վայրի, այլ ոչ թե ըստ նրա, ենթադրենք, Ապարանից են, թե Մարտունիից»,- նկատեց նա:
Դավիթ Ջալոյանի խոսքով, խնդրի մասին խոսելով՝ ինքը կարող է անգամ հղում անել ՀՀ վարչապետին: «Տիգրան Սարգսյանն ասում է, որ պետությունը հետամնաց երևույթ է, և հիմա արդյունավետ են ցանցային կապերը: Սա նշանակում է, որ Հայաստանի ներսում աշխատում են ոչ թե բնականոն, սոցիալական այլ ցանցային կապերը: Եթե վարչապետն է ասում, որ շատ լավ բան է, լավ է, որ պետությունը թուլանում է, ցանցային կապեր են ստեղծվում, չգիտեմ ինչ ասեմ: Սա տագնապ է առաջացնում»,- ամփոփեց մշակութաբանը:
