«Չենք լռելու»-ի ունեցած տեղեկություններով` ԶՈւ ԳՇ պետ Յուրի Խաչատուրովի ոչ պաշտոնական հրամանով Երևանում գտնվող կենտրոնական հավաքակայանում այս օրերին տարօրինակ երևույթներ են կատարվում` այն երիտասարդները, որոնք ունեն սահմանափակ զինծառայության պիտանելիության աստիճան, որպես կանոն, ուղարկվում են Լեռնային Ղարաբաղի Հանրապետություն:
«Եթե ընդունենք, որ Արցախը լարվածության օջախն է, միանշանակ, այնտեղ պետք է ծառայություն կրեն առողջ զինվորներ: Բայց ստացվում է, որ, անհայտ պատճառներով, ԼՂՀ են հիմնականում ուղարկվում սահմանափակ պիտանելիություն ունեցողները:
Չի՞ ստացվում արդյոք, որ միտումնավոր թուլացվում է մեր հայրենիքի պաշտպանունակությունը:
Այդ «ներքին հրամանի» հարցով, միանշանակ, պետք է հետաքրքրվեն համապատասխան մարմինները, քանի որ սա կարելի է որակավորել որպես պետական հանցագործություն»,- նշված է նախաձեռնության տարածած հաղորդագրության մեջ:
«Չենք լռելու» նախաձեռնությունից «Առաջին լրատվական»-ին տեղեկացնում են, որ իրենք ուրախ կլինեն, որ իրենց ստացած տեղեկությունները չհիմնավորվեն:
«Ըստ մեր տեղեկությունների` ԳՇ պետի կողմից տրված է «ներքին» կարգադրություն, որ բանակ զորակոչեն անգամ հիվանդ երիտասարդներին, ինչը հանդիսացել է հակամարտության պատճառ նրա և կենտրոնական հավաքակայանի բժշկական հանձնաժողովի նախագահի միջև:
Վերջինս մի քանի օր առաջ հեռացվել է զբաղեցրած պաշտոնից:
Եթե այս տեղեկատվությունն, ըստ ԳՇ-ի, չի համապատասխանում իրականությունը, «Չենք լռելու»-ն խնդրում է իրազեկել հանրությանը սահմանափակ, զինծառայությանը պիտանի երիտասարդների` ըստ Հայաստանի և Արցախի զորամասերի տեղաբաշխման տոկոսային պատկերին»,- նշված է հաղորդագրության մեջ:
