Եգիպտոսի խորհրդարանական ընտրութունների երկրորդ փուլը չի փոխել ուժերի դասավորվածությունը. առաջին տեղում կրկին իսլամիստական կուսակցություններն են, որոնց հաջորդում են լիբերալները: Այս մասին հաղորդում է РИА Новости-ն:
Ընտրությունների երկրորդ փուլի շրջանակներում քվեարկել են Եգիպտոսի 27 մարզերից 9-ը, որտեղ բնակվում է 18 միլիոն ընտրող: 180 պատգամավորական աթոռի համար պայքար են մղում 33 կուսակցությունների ներկայացուցիչներ և մի քանի հազար անկախ թեկնածուներ:
Քվեարկության նախնական արդյունքների համաձայն՝ «Մուսուլման եղբայրներ»-ի քաղաքական թևը` «Ազատության և արդարություն կուսակցությունը» առաջ է անցել Գիզայում, Շարկիյայում, Ասուանում, Բենի-Սուեյֆում և Բուհեյրայում: Միևնույն ժամանակ, նրանց արմատական հակառակորդը` սալաֆիական «Ալ-Նուրի» կուսակցությունը, հաղթանակ է տարել Սուեզում:
Աշխարհիկ «Ալ-Կուտլա» և լիբերալ «Վաֆդ» կուսկացությունները կիսում են երրորդ և չորրորդ տեղերը:
Հիշեցնենք, որ Եգիպտոսի խորհրդարանական ընտրությունների առաջին փուլում հաղթանակ են տարել իսլամիստները: Շատերի համար անսպասելի էր ոչ թե «Մուսուլման եղբայրների» և նրանց «Ազատություն և արդարություն» կուսակցության վստահ հաղթանակը, այլ երկրորդ տեղը զբաղեցրած սալաֆիների («Ալ-Նուր» կուսակցություն) հաղթանակը:
